Category: Yudit

1 Ɛnna Holoferne ka kyerɛɛ no sɛ: Ɔbaa nya akokoɔduro na mmɔ hu wɔ w’akoma mu, ɛfiri sɛ menyɛɛ obiara a ɔpɛ sɛ ɔsom Nebukadnessar, asase nyinaa so hene no bɔne da.

2 Na seesei ara mpo, sɛ wo nkurɔfoɔ a wɔwɔ nkokoɔ aman no mu amfa m’anim antwitwi fam a, ɛnneɛ anka mantwe me pea antia wɔn. Wɔn ara na wɔatwetwe yeinom nyinaa ama wɔn ho.

3 Na afei ka kyerɛ me deɛ nti a woadwane afiri wɔn mu na woaba yɛn nkyɛn ha yi. Na sɛdeɛ ɛte biara, biribiara renyɛ wo. Nya akokoɔduro! Wobɛtena ase anadwo yi ne nna a ɛdi akyire nyinaa.

4 Obiara mpira wo. Na mmom wɔn nyinaa ne wo bɛdi no yie, sɛdeɛ wode yɛ me wura Nebukadnessar asomfoɔ no.

Yudit kyerɛ sɛnti a ɔwɔ hɔ

5 Na Yudit buaa no sɛ: Gye w’afenaa asɛm to mu, na ma w’abaawa nkasa wɔ w’anim, na merentwa atorɔ biribiara ho nkyerɛ me wura anadwo yi.

6 Na sɛ wodi w’afenaa asɛm so a, ɛnneɛ Onyankopɔn nam wo so bɛdi dwuma bi, na ɛmma sɛ me wura nsa renka ne botaeɛ.

7 Na sɛ Nebukadnessar, asase nyinaa so hene te aseɛ yi, ne deɛ ɔwɔ tumi a wasoma wo sɛ kyerɛ akra nyinaa kwan no; ɛnyɛ nnipa nko na wo nti wɔsom no, na mmom nwira mu mmoa ne anantwie ne ewiem nnomaa bɛtena ase, ɛsiane wo tumi a ɛhyɛ Nebukadnessar ne ne fie aseɛ no nti.

8 Na yɛate wo nyansa ne wo mmɔdemmɔ nka, na wɔka no wiase nyinaa mu sɛ wo nkutoo ne onipa papa wɔ ahennie no nyinaa mu, deɛ ɔnim de ne deɛ ne ho yɛ nwanwa wɔ akodie mu.

9 Afei ɛfa Akior asɛm a ɔkaeɛ wɔ wo badwam no deɛ, yɛatie ne nsɛm no, na nnipa a wɔwɔ Betulia no de ne ho kyɛɛ no, na ɔkaa nsɛm a na waka akyerɛ wo no nyinaa kyerɛɛ wɔn.

10 Yei nti, me wura ne me panin, mmu nsɛm a ɔkaeɛ no nsɛnhunu, na mmom fa sie w’adwene mu, ɛfiri sɛ ɛyɛ nokorɛ. Ampa ara, wɔrentumi ntwe yɛn man aso, anaasɛ, nkrantɛ ntumi nni yɛn so gye sɛ wɔyɛ bɔne tia wɔn Nyankopɔn.

11 Na afei, sɛdeɛ ɛbɛyɛ na wɔnni me wura so nkonim na ne botaeɛ nyɛ kwa no, owuo bɛba wɔn so, ɛfiri sɛ bɔne adi wɔn so a ɛnam so ahyɛ wɔn Nyankopɔn abufuo, berɛ a wɔyɛɛ deɛ ɛnyɛ no.

12 Ɛnam sɛ wɔnya aduane nnie na aka kakra na wɔn nsuo asa nti, wɔayɛ nhyehyɛɛ sɛ wɔbɛkum wɔn anantwie, na wɔawe ataa so sɛ wɔbɛdi deɛ Onyankopɔn mmara si wɔn kwan sɛ wɔnnie no nyinaa.

13 Wɔasi agyinaeɛ sɛ wɔbɛdi aburoo aba a ɛdi kan ne nsa ne ngo so ntotosoɔ du du, a wɔayi asi hɔ ama asɔfoɔ a wɔsom Onyankopɔn anim wɔ Yerusalem no — nnoɔma a mmara no mma ho kwan mma nnipa no mfa wɔn nsa nka mpo no.

14 Na ɛsiane sɛ nnipa a wɔwɔ Yerusalem no reyɛ yei nti, wɔasoma abɔfoɔ akɔ hɔ sɛdeɛ ɛbɛyɛ na wɔbɛsrɛ kwan afiri mpanimfoɔ badwa no hɔ.

15 Sɛ wɔn nsa ka mmuaeɛ no na wɔyɛ saa pɛ a, ɛda no ara wɔde wɔn bɛhyɛ wo nsa na woasɛe wɔn.

16 Saa nti, ɛberɛ a me, w’afenaa metee yeinom nyinaa no, medwane firii wɔn nkyɛn. Onyankopɔn asoma me sɛ mene wo mmɛdi dwuma bi a ɛbɛyɛ wiase nyinaa, nnipa dodoɔ a wɔbɛte nyinaa nwanwa.

17 Nokorɛ nie, w’afenaa suro Onyankopɔn na ɔsom ɔsoro Nyankopɔn awia ne anadwo. Saa nti me wura, mɛtena wo nkyɛn ha ara; na mmom anadwo biara, w’afenaa bɛkɔ bɔnhwa no mu akɔbɔ Onyankopɔn mpaeɛ. Ɔbɛka akyerɛ me ɛberɛ a wɔayɛ bɔne no.

18 Ɛno ansa na mɛba abɛka akyerɛ wo, na afei wo ne w’asraafoɔ nyinaa akɔ, na wɔn mu baako mpo rentumi nnyina w’anim.

19 Ɛnna afei mɛdi w’anim afa Yudea, kɔsi sɛ wobɛduru Yerusalem; ɛhɔ na mede w’ahennwa bɛsie. Wobɛka wɔn sɛ nnwan a wɔnni ɔhwɛfoɔ, na ɔkraman biara rentumi mmue n’ano mpo na wapɔ wo. Ɛfiri sɛ wɔaka yei akyerɛ me dada; wɔka kyerɛɛ me, na wɔsomaa me sɛ memmɛka nkyerɛ wo.

20 Ne nsɛm no sɔɔ Holoferne ne n’asomfoɔ no nyinaa ani. Na ne nyansa a ɔwɔ no yɛɛ wɔn nwanwa, na wɔkaa sɛ:

21 Ɔbaa biara nni hɔ firi asase ano kɔsi asase ano a ne ho yɛ fɛ anaa ɔkasa nyansa mu sei!

22 Ɛnna Holoferne ka kyerɛɛ no sɛ: Onyankopɔn ayɛ no yie sɛ ɔsomaa wo dii nkurɔfoɔ no anim, sɛ bɛhyɛ yɛn nsam den na fa ɔsɛeɛ mmra wɔn a wɔabu me wura animtia no so.

23 Ɛnyɛ wo ho ara nko na ɛyɛ fɛ, na mmom wokasa nyansa mu. Sɛ woyɛ sɛdeɛ woaka no deɛ a, wo Nyankopɔn bɛyɛ me Nyankopɔn, na wobɛtena Ɔhene Nebukadnessar fie, na wɔbɛte wo nka wɔ wiase nyinaa mu.

Yudit gyina pintinn wɔ ne Nyamesom mu

1 Afei ɔhyɛɛ sɛ wɔmfa Yudit mmra faako a wɔkora ne dwetɛ nnoɔma a wɔdidi mu anwummerɛ no, na ɔhyɛɛ wɔn sɛ wɔnto no pono na wɔmfa n’ankasa n’aduane ne ne nsa ma no nnom.

2 Nanso Yudit kaa sɛ: Menni yeinom mu biara, anaasɛ meyɛ a meto mmara; na mmom mɛnya biribiara afiri nnoɔma a mede kaa me ho baeɛ no mu.

3 Holoferne ka kyerɛɛ no sɛ: Sɛ wo nnoɔma no sa a, ɛhefa na yɛbɛnya saa nnoɔma korɔ no ara bi ama wo? Ɛfiri sɛ wo nkurɔfoɔ no mu biara nni yɛn nkyɛn ha yi.

4 Yudit buaa sɛ: Sɛ wo kra te aseɛ yi, me wura, ɛnyɛ adeɛ a w’afenaa bɛma nnoɔma yi a ɛwɔ me nkyɛn ha yi asa, ansa na Awurade nam me nsa so ayɛ adeɛ a wabɔ ne tirim sɛ ɔbɛyɛ no.

5 Ɛnna afei Holoferne asomfoɔ no de no baa ntomadan no mu, na ɔdae kɔsii dasuom. Adeɛ rebɛkye no, ɔsɔre

6 soma kɔka kyerɛɛ Holoferne sɛ: Afei ma me wura nhyɛ na wɔmma me kwan mfiri adi nkɔbɔ mpaeɛ.

7 Ɛno nti Holoferne hyɛɛ ne banbɔfoɔ no sɛ wɔnsi no kwan. Na ɔtenaa nsraban no mu nnansa, na ɔkɔɔ Betulia bɔnhwa anadwo biara kɔdwaree wɔ nsuwa a ɛwɔ nsraban no mu hɔ.

8 Sɛ ɔdware wie a, ɔbɔ Awurade Israel Nyankopɔn mpaeɛ sɛ ɔnkyerɛ no kwan a ɛde nkonimdie bɛbrɛ ne nkurɔfoɔ.

9 Afei ɔsane ba wɔ ahoteɛ mu na watena ntomadan no mu de kɔsi sɛ ɔbɛdi aduane berɛ a onwunu redwoɔ no.

Yudit kɔ Holoferne apontoɔ ase

10 Da a ɛtɔ so nan no, Holoferne too pono maa n’asomfoɔ no nkutoo, na wamfrɛ ne mpanimfoɔ no mu biara.

11 Na ɔka kyerɛɛ Bagoas, opiani a ɔno na ɔhwɛ n’ankasa ne nnoɔma so sɛ: Kɔsrɛ Hebrini baa a wohwɛ no soɔ no sɛ ɔmmɛka yɛn ho na yɛnnidi na yɛnnom.

12 Na ɛbɛyɛ aniwuo sɛ yɛbɛma ɔbaa a ɔte sɛɛ akɔ berɛ a yɛne no nna. Sɛ yɛannane n’adwene a, ɔbɛsi yɛn atwetwe.

13 Saa nti Bagoas firii Holoferne anim kɔe, na ɔkɔɔ Yudit nkyɛn kɔsee no sɛ: Ma abaayewa fɛfɛ yi nyɛ no ntɛm mmra me wura nkyɛn na ɔnhyɛ no animuonyam wɔ n’anim, na ɔnnom nsa nsɛpɛ ne ho, na ɛnnɛ da yi ɔnyɛ sɛ Asiriafoɔ mmaa no mu baako a ɔsom wɔ Nebukadnessar ahemfie no.

14 Yudit buaa sɛ: Mene hwan sɛ mɛpopo me ti akyerɛ me wura? Mɛyɛ ntɛm ayɛ biribiara a ɛsɔ n’ani, na ɛbɛyɛ me anigyeɛ de akɔsi me wu da!

15 Enti ɔsɔree, na ɔde ne mmaa afɛfɛdeɛ nyinaa siesiee ne ho. N’abaawa dii n’anim de adwammaa nwoma a wanya afiri Bagoas a sɛ daa ɔredidi a ɔtwere soɔ no, sesɛɛ fam maa no wɔ Holoferne anim.

16 Ɛnna afei Yudit bae bɛdaa hɔ. Na Holoferne nyaa ne ho akɔnnɔ dendeenden wɔ n’akoma mu, na n’atenka kɔɔ soro, ɛfiri sɛ na watwɛn ahwehwɛ firi da a ɛdi kan a ɔhunuu no sɛ ɔbɛnya berɛ adane n’adwene.

17 Enti Holoferne ka kyerɛɛ no sɛ: Afei nom, na ma yɛnsɛpɛ yɛn ho!

18 Yudit kaa sɛ: Mede anigyeɛ bɛnom, me wura, ɛfiri sɛ ɛnnɛ ne anigyeɛ da kɛseɛ wɔ me nkwa nna nyinaa mu.

19 Ɛnna afei ɔfaa deɛ na n’abaawa asiesie no na ɔdiiɛ na ɔnomee wɔ n’anim.

20 Na Holoferne ani gyee ne ho kɛseɛ, na ɔnomm nsa pii, deɛ ɛdɔɔso sene nsa a wanom pɛn ɛfiri berɛ a wɔwoo no.

Yudit twa Holoferne ti

1 Onwunu dwoeɛ no, ntɛm ara na ne nkoa no twee wɔn ho. Bagoas too ntomadan no mu wɔ akyire, na ɔyii asomfoɔ no firii ne wura anim. Wɔn nyinaa kɔdaeɛ. Na na wɔabrɛbrɛ ɛsiane sɛ, wɔkyɛree wɔ apontoɔ no ase.

2 Ɛno nti ɛkaa Yudit nko ara wɔ ntomadan no mu hɔ, a Holoferne bea ne mpa so, ɛsiane sɛ na waboro papaapa.

3 Afei nso na Yudit aka akyerɛ n’abaawa no sɛ ɔntwɛn wɔ dabekyire no akyi kɔsi sɛ ɔbɛba, sɛdeɛ na ɔyɛ no nna a aka no; ɛsiane sɛ na waka sɛ ɔbɛfiri adi akɔbɔ ne mpaeɛ no. Na waka saa nso akyerɛ Bagoas.

4 Saa nti obiara firii adi, na anka obiara, sɛ ketewa anaa kɛseɛ, obiara anka wɔ dabekyire no mu. Ɛnna afei Yudit gyinaa ne mpa no ho, ɔkaa wɔ ne koma mu sɛ: O Awurade Nyankopɔn, tumi nyinaa wura, ɛdɔn yi mu, hwɛ me nsa ano adwuma na fa so korɔn Yerusalem.

5 Ampa ara, afei na ɛberɛ aduru sɛ woboa w’agyapadeɛ, na meyɛ deɛ mahyehyɛ sɛ mede rebɛsɛe atamfoɔ a wɔasɔre atia yɛn no.

6 Ɔkɔgyinaa mpadua a ɛbɛn Holoferne ti ho no, na ɔyii ne nkrantɛ a na ɛsɛne hɔ no.

7 Ɔtwi bɛnee ne mpa no, na ɔsɔɔ ne tirinwi mu kaa sɛ: O Awurade, Israel Nyankopɔn, ma me ahoɔden nnɛ da yi!

8 Na ɔde n’ahoɔden nyinaa twaa ne kɔn mprenu, na ɔtwaa ne ti.

9 Afei ɔmunii ne sini no firii mpa no so, na ɔtwetwee ntoma a wɔde akata mpadua no ho no firii dua no so. Ɛyɛɛ kakra no, ɔfirii adi de Holoferne ti no kɔmaa n’abaawa no,

10 a ɔno nso de hyɛɛ n’aduane bɔtɔ mu.

Yudit sane ba Betulia

Ɛnna wɔn baanu no bɔɔ anan sɛdeɛ wɔtaa yɛ no sɛ wɔbɔ mpaeɛ no. Wɔtwaam faa nsraban no mu, na wɔtwaa bɔnhwa no ho hyiae, na wɔforoo bepɔ no kɔɔ Betulia, na wɔbɛduruu n’apono ano.

11 Yudit firii akyirikyiri frɛɛ awɛmfoɔ a wɔwɛn ɛpono no sɛ: Bue, bue pono no! Onyankopɔn, yɛn Nyankopɔn ka yɛn ho, na ɔda so ara kyerɛ ne tumi wɔ Israel, ne n’ahoɔden kyerɛ yɛn atamfoɔ, sɛdeɛ wayɛ no ɛnnɛ da yi!

12 Na ɛberɛ a nkurɔfoɔ a wɔwɔ kuro no mu tee ne nne no, wɔyɛɛ ntɛm siane baa kuro pono no ano, na wɔfrɛfrɛɛ kuro no mu mpanimfoɔ.

13 Wɔn nyinaa tuu mmirika, nketewa ne akɛseɛ, ɛfiri sɛ na wɔnnye nni sɛ ɔbɛtumi asane aba. Wɔbuee ɛpono no maa wɔbaa mu. Afei wɔsɔɔ gya de nyaa hann, na wɔtwaa ho hyiae.

14 Na ɔde nne kɛseɛ teaam sɛ: Monyi Awurade ayɛ, O monyi no ayɛ! Monyi Awurade ayɛ, ɔno a wamfa ne mmɔborɔhunu ankame Israel fie, na mmom ɔnam me nsa so asɛe yɛn atamfoɔ anadwo yi ara!

15 Ɛnna afei ɔyii etire no firii bɔtɔ no mu kyerɛɛ wɔn, na ɔkaa sɛ: Monhwɛ ha, Asiriafoɔ sahene Holoferne ti ne ntoma a na ɛkata mpadua so a waboro sram da so no nie. Awurade nam ɔbaa nsa so aku no.

16 Na sɛ Awurade te aseɛ yi, ɔno a wabɔ me ho ban wɔ ɔkwan a mekɔeɛ no, meka ntam sɛ ɛyɛ m’animdua na ɛdaadaa no kɔɔ ne sɛeɛ mu, na ɔne me anyɛ bɔne biara a ɛgu me ho fi na ɛgu m’anim ase.

17 Nnipa no nyinaa ho dwirii wɔn kɛseɛ. Wɔbɔɔ wɔn mu ase sɔree Onyankopɔn, na wɔde ano koro kaa sɛ: Nhyira nka wo, yɛn Nyankopɔn a ɛnnɛ da yi woabrɛ wo nkurɔfoɔ atamfoɔ aseɛ.

18 Ɛnna afei Ussia ka kyerɛɛ no sɛ: O ɔba, Ɔsorosoro Nyankopɔn no ahyira wo asene mmaa nyinaa wɔ asase so; na nhyira nka Awurade Nyankopɔn a ɔbɔɔ soro ne asase, ɔno a waboa wo ama woakɔtwa yɛn atamfoɔ sahene ti.

19 W’ayeyie remfiri wɔn a wɔkae Onyankopɔn tumi no akoma mu da.

20 Onyankopɔn mma yei nyɛ daa animuonyam mma wo, na ɔnhyira wo, ɛfiri sɛ woankame w’ankasa wo nkwa, ɛberɛ a wɔbrɛɛ yɛn man aseɛ no, wosii yɛn sɛeɛ ho kwan, sɛ wonantee tee kwan so wɔ Onyankopɔn anim. Na nkurɔfoɔ no nyinaa kaa sɛ: Amen, Amen!

Yudit afotuo

1 Afei Yudit ka kyerɛɛ wɔn sɛ: Adɔfonom, montie me. Momfa saa etire yi na momfa nsɛne mo dan atifi ban ho.

2 Na sɛ adeɛ kye na owia repue a, mo mu biara mfa mmia, na ma mmarima akokoɔdurufoɔ no mu biara mfiri kuro no mu; monyi ɔsahene nni mo anim sɛ gyama moresiane akɔ petee mu atoa Asiriafoɔ wɔ wɔn nsraban mu; nso monnsiane nkɔ.

3 Ɛnna wɔbɛfa wɔn akodeɛ na wɔakɔ nsraban no mu, na wɔakɔkanyan Asiriafoɔ asraafoɔ akannifoɔ no. Wɔbɛtu mmirika akɔ Holoferne ntomadan no mu, nanso wɔrenhu no. Afei ahopopoɔ bɛka wɔn nyinaa, na wɔadwane afiri mo anim.

4 Afei mo a motete Israel ahyeɛ so nyinaa bɛti wɔn, na moakunkum wɔn berɛ a wɔgu so redwane no.

5 Nanso ansa na mobɛyɛ yeinom nyinaa no, momfa Amonni Akior mmrɛ me, sɛdeɛ ɛbɛyɛ na ɔbɛhwɛ na wahunu onipa a ɔbuu Israel fie animtia no na ɔde no brɛɛ yɛn sɛdeɛ gyama ɔrekɔwu.

6 Ɛno nti wɔkɔfaa Akior firii Ussia fie baeɛ. Na ɛberɛ a ɔbɛhunuu Holoferne ti sɛ ɛkura mmarima no mu baako nsam wɔ nkurɔfoɔ no nhyiamu no mu no, ɔhwee fam sɛdeɛ ne honhom afiri ne mu.

7 Na ɛberɛ a wɔmaa no so gyinaeɛ no, ɔhwee Yudit nan ase de anidie maa no, na ɔkaa sɛ: Nhyira nka wo wɔ Yuda ntomadan biara mu! Aman nyinaa mu, obiara a ɔbɛte wo din no ho bɛpopo.

8 Afei na ka kyerɛ me deɛ nna yi nyinaa mu woayɛ.

Ɛno nti Yudit ka kyerɛɛ no wɔ nnipa no anim deɛ ɔyɛeɛ nyinaa, ɛfiri ɛda a ɔkɔeɛ kɔsi ɛberɛ a ɔfirii aseɛ kasa kyerɛɛ wɔn no.

9 Na ɛberɛ a wakasa awie no, nkurɔfoɔ no de nne kɛseɛ teaam na wɔde ahurisie yɛɛ dede wɔ wɔn kuro mu.

10 Na ɛberɛ a Akior hunuu deɛ Israel Nyankopɔn ayɛ no, ɔgyee Onyankopɔn dii dendeenden. Enti, wɔtwaa no twetia na ɔbɛkaa Israel fie ho, na ɔwɔ mu ara de bɛsi nnɛ.

Holoferne wuo da adi

11 Na ahemadakye no, wɔde Holoferne ti no sɛnee ɔfasuo no ho. Ɛnna afei wɔn nyinaa miaeɛ, na wɔfirii adi akuakuo kɔɔ ɔkwan a ɛda mmepɔ no ho.

12 Na ɛberɛ a Asiriafoɔ no hunuu wɔn no, wɔde nkra kɔmaa wɔn asahene, na wɔn nso kɔɔ wɔn asafohene ne asahene ne wɔn mpanimfoɔ nyinaa nkyɛn.

13 Wɔbɛduruu Holoferne ntomadan mu na wɔka kyerɛɛ ne piafoɔ a wɔhwɛ n’ankasa nnoɔma soɔ sɛ: Nyane yɛn wura, ɛfiri sɛ nkoa no anya akokoɔduro asiane aba rebɛne yɛn ako, na yɛrebɛsɛe wɔn korakora.

14 Ɛno nti Bagoas hyɛnee mu na ɔkɔbɔɔ ntomadan no pono mu, na ɔdwene sɛ ɔne Yudit da hɔ.

15 Nanso ɛberɛ a obiara annye soɔ no, ɔbueeɛ na ɔkɔɔ dabekyire hɔ kɔhunuu sɛ ɔda hɔ kagyaa awu da ɛfam apa so na ne ti ntua soɔ.

16 Ɔde nne kɛseɛ teateaam sui na ɔsii apinie, na ɔsunsuanee ne ntadeɛ mu.

17 Afei ɔkɔɔ ntomadan a na Yudit te mu no mu, na wanhu no no, ɔtuu mmirika teateaam kɔɔ nkurɔfoɔ no hɔ kɔkaa sɛ:

18 Nkoa no adaadaa yɛn! Hebrini baa baako de animguaseɛ aba Ɔhene Nebukadnessar fie. Hwɛ, Holoferne na ɔda fam, na ne ti ayera no!

19 Na ɛberɛ a Asiriafoɔ asraafoɔ no tee yei no, wɔsunsuanee wɔn ntadeɛ mu na wɔn akoma tuu pa ara, na wɔn su ne wɔn nteateam no gyegyee nsraban no mu hɔ nyinaa.

Asiriafoɔ de ahopopoɔ dwane

1 Na ɛberɛ a mmarima a wɔwɔ ntomadan no mu teeɛ no, asɛm a asie no yɛɛ wɔn nwanwa.

2 Suro ne ahopopoɔ hyɛɛ wɔn so, na wɔantwentwɛn wɔn ho wɔn ho, na mmom wɔgyee twi firii adi na wɔdwaneeɛ, ɔkwan biara a obiara bɛnya na ɔfaa soɔ wɔ petee mu hɔ wɔ nkokoɔ man no mu nyinaa.

3 Wɔn a wɔakyere nsraban wɔ nkokoɔ a atwa Betulia ho ahyia no nso dwaneeɛ. Ɛnna afei Israel asraafoɔ no firii adi to hyɛɛ wɔn so.

4 Ussia somaa mmarima kɔɔ Betomastaim, Koba ne Kola, ne Israel ahyeɛ so nyinaa sɛ wɔnkɔka deɛ asie na wɔakasa akyerɛ wɔn ama wɔafiri adi ato ahyɛ atamfoɔ no so asɛe wɔn.

5 Na ɛberɛ a Israelfoɔ teeɛ no, wɔyɛɛ koro kɔɔ atamfoɔ no so, na wɔkunkumm wɔn kɔsii Koba. Wɔn a wɔwɔ Yerusalem ne nkokoɔ man so nso baeɛ, ɛfiri sɛ wɔka kyerɛɛ wɔn nsɛm a ɛsiiɛ wɔ ɔtamfoɔ no nsraban mu. Mmarima a wɔwɔ Gilead ne Galilea twaree wɔn kaa wɔn hyɛɛ mfimfini kumm wɔn mu pii ara, mpo wɔtraa Damasko ne n’ahyeɛ so.

6 Nnipa nkaeɛ a wɔwɔ Betulia no toaa Asiriafoɔ nsraban no kɔfomm wɔn nnoɔma, wɔnyaa ahodeɛ pii.

7 Na Israelfoɔ no kɔkunkumm wɔn sane baeɛ no, wɔbɛfaa nnoɔma a aka no. Na nkuraa ne nkuro a ɛwɔ nkokoɔ aman so ne petee mu no mpo nyaa asadeɛ pii, ɛsiane sɛ nnoɔma a ɛdɔɔso na na ɛwɔ hɔ.

Israelfoɔ hyɛ wɔn nkonimdie ho fa

8 Ɛnna Ɔsɔfopanin Yoakim ne Israel mpanimfoɔ a wɔtenaa Yerusalem no baa sɛ wɔrebɛhwɛ nnoɔma pa a Awurade ayɛ ama Israel, na wɔahwɛ Yudit na wɔama no amo.

9 Na ɛberɛ a wɔhyiaa no no, wɔde anokorɔ hyiraa no na wɔka kyerɛɛ no sɛ: Wone Yerusalem animuonyam no, wo na Israel de wo hyehye ne ho, wone yɛn man ahohoahoa!

10 Wode w’ankasa wo nsa na ayɛ yeinom nyinaa; woayɛ papa a ɛso ama Israel, na asɔ Onyankopɔn ani. Awurade Tumfoɔ no nhyira wo daa daa! Na nnipa no nyinaa kaa sɛ: Amen.

11 Nnipa no nyinaa fomm nsraban no nna aduasa. Wɔde Holoferne ntomadan ne dwetɛ nnoɔma a ɔdidi mu anwummerɛ, ne mpa, ne nkyɛnsee ne ne nkonnwa nyinaa maa Yudit. Ɔfaa nnoɔma no de soaa ne mfunumupɔnkɔ na ɔyɛɛ ne teaseɛnam no yie na ɔde nnoɔma no guu mu.

12 Afei mmaa a wɔwɔ Israel nyinaa boaa wɔn ano bɛhwɛɛ no, na wɔhyiraa no, na wɔn mu binom saeɛ de hyɛɛ no animuonyam. Na ɔfaa nnubaa kuraa ne nsam, na ɔkyekyɛ maa mmaa a na wɔka ne ho no;

13 na ɔne wɔn a na wɔka ne ho no de ngo nhahamma nkyekyereeɛ hyehyɛɛ wɔn ti. Ɔdii nkurɔfoɔ no nyinaa anim saeɛ, ɔdii mmaa no anim, na Israel mmarima no toaa so kurakuraa wɔn akodeɛ ne nhwiren a wɔakyekyerɛ hyehyɛɛ wɔn ho na wɔtoo dwom.

Yudit to n’ayeyie dwom

14 Yudit firii aseɛ daa ase wɔ Israelfoɔ nyinaa anim, na nkurɔfoɔ no nyinaa de nne a ɛgyegyeɛ too saa dwom yi.

1 Ɛnna Yudit too dwom kaa sɛ:

Momfa akasae nhyɛ dwontoɔ ase ma me Nyankopɔn,

momfa nnonno nto dwom ma m’Awurade.

Monto dwom foforɔ ma no;

momma no so, na mommɔ ne din.

2 Na Awurade ne Onyankopɔn a ɔka akodie hyɛ;

ɔde ne ntomadan si ne nkurɔfoɔ mu;

na ɔgye me firi m’atifoɔ nsam.

3 Asiriafoɔ no firii atifi mmepɔ so baeɛ;

ɔne n’akofoɔ pii baeɛ;

wɔn dodoɔ asi mmonhwa no,

na wɔn apɔnkɔsotefoɔ akata nkokoɔ no so.

4 Ɔka de hoahoaa ne ho sɛ ɔbɛhye me man,

na ɔde afena akunkum me mmeranteɛ,

na ɔde me nkokoaa ahwehwe fam,

na wakyere me mmɔfra sɛ asadeɛ,

na wafa me mmabunu sɛ fomadeɛ.

5 Nanso Awurade Tumfoɔ

nam ɔbaa nsa so ama no ayɛ kwa.

6 Ɛfiri sɛ wɔn katakyie no antɔ wɔ mmeranteɛ nsa ano,

ɛnna ɛnyɛ Titan mma na wɔkumm no,

anaa abrane na wɔto hyɛɛ ne soɔ;

na mmom Merari babaa Yudit,

n’anim fɛfɛ no na ɔde nyaa no.

7 Na ɔyii ne kunayɛ ntoma guu hɔ

na ɔde ama wɔn a wɔrehyɛ wɔn soɔ no so wɔ Israel.

Ɔde sradehwan sraa n’anim;

8 ɔsiesiee ne ti yɛɛ no takuwa

na ɔhyɛɛ nwera atadeɛ de daadaa no.

9 Ne mpaboa yɛɛ n’ani so fɛ,

n’ahoɔfɛ faa n’adwene dommum,

na nkrantɛ twaa ne kɔn!

10 Persiafoɔ no ho popoo wɔ n’akokoɔduro ho,

Medefoɔ no ho dwirii wɔn wɔ ne nnamyɛ ho.

11 Afei me nkurɔfoɔ a wɔhyɛ wɔn so no teaam;

me nkurɔfoɔ a wɔyɛ mmerɛ no suiɛ, na ɔtamfoɔ no ho popoeɛ;

wɔmaa wɔn nne so, na ɔtamfoɔ no sanee n’akyi.

12 Mfenaa mmammarima hwiree wɔn mu,

na wɔapira wɔn sɛ akobɔfoɔ mma;

wɔwuwuiɛ wɔ m’Awurade asraafoɔ anim.

13 Mɛto dwom foforɔ ama me Nyankopɔn:

O Awurade, woyɛ kɛseɛ ne onimuonyamfoɔ,

ɔnwanwani wɔ ahoɔden mu, a wɔnhu wo.

14 Ma w’abɔdeɛ nyinaa nsom wo,

ɛfiri sɛ wokasae na wɔbaeɛ.

Wosomaa wo honhom, na ɛbɔɔ wɔn;

obiara nni hɔ a ɔtumi si deɛ woaka no kwan.

15 Ɛfiri sɛ mmepɔ bɛwoso akɔduru wɔn fapem;

na nsuo nso bɛwoso akɔduru wɔn fapem;

mmotan bɛnane sɛ sradeɛ ntentan wɔ w’anim.

Na mmom wɔn a wɔsuro wo no,

wohu wɔn mmɔbɔ.

16 Ɛfiri sɛ afɔrebɔ biara a ɛyɛ ohwam afɔrebɔ yɛ ade ketewa,

na sradeɛ a ɛwɔ ɔhyeɛ afɔdeɛ mu no nyinaa no yɛ wo ade ketewa bi;

na mmom obiara a ɔsuro Awurade no bɛkɔ so ara ayɛ kɛseɛ.

17 Nnome nka aman a wɔsɔre tia me nkurɔfoɔ!

Awurade Tumfoɔ no bɛtɔ wɔn so were wɔ atemmuo da no;

na ɔbɛsoma ogya ne mmoaa akɔ wɔn honam mu;

na wɔbɛsu wɔ yea mu afebɔɔ.

18 Ɛberɛ a wɔduruu Yerusalem no, wɔsomm Onyankopɔn. Na nkurɔfoɔ no tee wɔn ho ara pɛ no, wɔbɔɔ ɔhyeɛ afɔdeɛ, mmasoɔ afɔdeɛ na wɔde wɔn akyɛdeɛ maeɛ.

19 Yudit de Holoferne agyapadeɛ a nkurɔfoɔ no de ama no no nyinaa maa Onyankopɔn, na ntoma a na ɛkata mpadua no ho a ɔfa firii dabekyire no, ɔde maa sɛ anohoba afɔdeɛ.

20 Na abosome mmiɛnsa na nnipa no gu so ara wɔ apontoɔ mu wɔ kronkronbea hɔ wɔ Yerusalem, na Yudit ne wɔn tenaa hɔ.

Yudit din gyeɛ ne ne wuo

21 Na yeinom nyinaa baa awieeɛ no, obiara sane kɔɔ ne fie, wɔn agyapadeɛ ho, na Yudit sane kɔɔ Betulia kɔtenaa n’agyapadeɛ ho. Na ne nkwa nna a aka nyinaa wɔhyɛɛ no animuonyam wɔ ɔman no mu nyinaa.

22 Mmarima bebree na wɔpɛɛ sɛ wɔware no, nanso wamfa ne ho amma ɔbarima biara wɔ ne nkwa nna nyinaa mu, ɛfiri berɛ a ne kunu Manase wuiɛ na ɔtoaa n’agyanom wɔ nseɛdo no akyi no.

23 Ɔkɔɔ so ara gyee din, na ɔnyini bɔɔ aberewa wɔ ne kunu fie, na ɔdii mfeɛ ɔha ne nnum. Ɔde n’abaawa no ho kyɛɛ no. Yudit wui wɔ Betulia, na wɔsiee no wɔ ne kunu Manase bodan mu;

24 na Israel fie suu no nna nson. Ansa na ɔrebɛwuo no, ɔkyekyɛɛ n’agyapadeɛ maa ne kunu Manase nkurɔfoɔ a wɔbɛn no no, ne ɔno ara nso nkurɔfoɔ a wɔbɛn no no.

25 Na ne berɛ so anaa ne wuo akyi mmerɛ tentene bi mu no, obiara ammɛteetee Israelfoɔ no bio.