Category: Tobit

1 Nwoma yi ka Tobit ho asɛm. Tobit agya ne Tobiel, a n’agya ne Ananiel, a n’agya ne Aduel, a n’agya ne Gabael, a n’agya ne Rafael; Asiel asefoɔ a wɔfiri Naftali abusuakuo mu.

2 Ɔno na Asiriahene Salmaneser berɛ so wɔfaa no dommum firi Tisbe a ɛwɔ Kades Naftali anafoɔ fam wɔ Galilea Atifi, wɔ Aser atifi a ɛkyerɛ atɔeɛ ne Fogor atifi fam no.

Tobit abrabɔ ahyɛaseɛ

3 Me Tobit, menantee wɔ nokorɛ ne tenenee kwan so me nkwa nna nyinaa. Meyɛɛ adɔeɛ bebree maa m’abusuafoɔ ne me man mufoɔ a wɔfaa wɔn ne me dommum kɔɔ Ninewe wɔ Asiriafoɔ asase so no.

4 Ɛberɛ a na meyɛ aberantewaa te me man Israel asase so no, me nana Naftali abusuakuo no nyinaa tu gyaa Dawid fie ne Yerusalem hɔ. Saa kuro yi ne faako a wɔayi wɔ Israel abusuakuo nyinaa mu, sɛ Israel abusuakuo nyinaa mmɔ afɔdeɛ, baabi a asɔrefie a ɛyɛ Ɔsorosoro Nyankopɔn tenabea wɔ, a wɔasi ate ho ama awoɔ ntoatoasoɔ nyinaa daa.

5 Na m’abusuakuo ne yɛn nana Naftali fie nyinaa bɔɔ afɔdeɛ maa nantwie ba honi a Ɔhene Yeroboam a ɔwɔ Israel de sii hɔ wɔ Dan ne Galilea mmepɔ nyinaa so no.

6 Nanso na me nko ara metaa kɔ Yerusalem afahyɛ, sɛdeɛ wɔahyɛ mmara a ɛntwa mu da ato hɔ ama Israelfoɔ nyinaa teɛ no. Na meyɛ ntɛm de nnuaba ne nnwankuo mu mmakan, anantwie so ntotosoɔ du du ne nnwan nwi a ɛdi kan a metwitwa no kɔ.

7 Mede yeinom nyinaa maa asɔfoɔ a wɔyɛ Aaron mma no wɔ afɔrebukyia no so; saa ara nso na mede ntotosoɔ du du a ɛfiri ayuo, nsa, ngo, atoaa aba, borɔdɔma, ne nnuaba nkaeɛ no maa Lewi mma a wɔsomm wɔ Yerusalem no. Afei nso, mesiee ntotosoɔ du du a ɛtɔ so mmienu wɔ sika mu a na mede kɔmema wɔ Yerusalem.

8 Ntotosoɔ du du a ɛtɔ so mmiɛnsa no, na mede ma nnyanka ne akunafoɔ ne ahɔhoɔ a wɔabɛtena Israel. Mede ba na mede ama wɔn wɔ afe a ɛtɔ so mmiɛnsa no mu, na yɛadi sɛdeɛ wɔahyɛ wɔ Mose mmara mu ne m’agya Tobiel ne na Debora ahyɛdeɛ no mu, ɛfiri sɛ na m’agya awu agya me ama mayɛ agyanka.

9 Meyɛɛ panin no, mewaree ɔbaa bi a ɔfiri yɛn abusua mu. Mene no woo ɔbabarima na metoo ne din Tobias.

10 Wɔfaa me dommum kɔɔ Asiria na mebaa Ninewe sɛ dommum no, me nuanom ne m’abusuafoɔ nyinaa dii Amanaman mufoɔ aduane;

11 nanso mekoraa me ho sɛ merenni Amanaman mufoɔ aduane no bi.

12 Ɛfiri sɛ na mebɔɔ m’adwenem pɔ sɛ mɛyɛ Onyankopɔn apɛdeɛ,

13 na Ɔsorosoroni no maa menyaa adom ne animuonyam wɔ Salmaneser anim, na me na na metotɔ n’ahiadeɛ nyinaa.

14 Kɔsi berɛ a ɔwuiɛ no, na metaa kɔ Media kɔtotɔ nnoɔma firi hɔ brɛ no. Na meda so wɔ Media man mu no, megyaa dwetɛ a ɛwɔ mmɔtɔ mu talente du maa Gabael a ne nuabarima ne Gabri sɛ ɔmfa nyɛ adwuma.

15 Nanso ɛberɛ a Salmaneser wuiɛ no, na ne ba Senakerib bɛdii n’adeɛ sɛ ɔhene no; kwantempɔn a na ɛkɔ Media no mu bɛyɛɛ hu, enti mantumi ankɔ Media bio.

Akokoɔduro a wɔde sie awufoɔ

16 Salmaneser ahennie nna mu no, meyɛɛ adɔeɛ nnwuma bebree maa me nuanom ne me nkurɔfoɔ.

17 Mede m’aduane maa wɔn a ɛkɔm de wɔn, na mefiraa wɔn a wɔda adagya ntoma; na sɛ mehunu me nkurɔfoɔ a wɔawu na wɔato wɔn afunu atwene Ninewe afasuo akyiri a, na mesie wɔn.

18 Na mesane siee obiara a Ɔhene Senakerib kumm no berɛ a na onii no redwane afiri Yudea wɔ nna no mu, na ɛsiane mmusuo a wabɔ nti na ɔsoro hene de n’atemmuo aba ne soɔ. Ɔfirii n’abufuo mu kumm Israelfoɔ bebree; nanso na mefa wɔn afunu no kɔsie no kodɛɛ. Ɛno nti ɛberɛ a Senakerib hwehwɛɛ wɔn no, wanhu wɔn.

19 Ɛnna Ninewefoɔ no mu baako kɔdii me ho nkɔnkɔnsa kyerɛɛ ɔhene sɛ, me na mesie wɔn; saa nti mehuntae. Na ɛberɛ a metee sɛ wɔrehwehwɛ me aku me no, mede suro dwaneeɛ.

20 Na wɔde nsa too m’agyapadeɛ nyinaa so; na wɔfaa me biribiara kɔkaa adehyeɛ fotoɔ ho, gye me yere Anna ne me ba Tobias.

21 Nanso adaduanan annuru na Senakerib mmammarima kumm no, na wɔdwane kɔɔ Ararat mmepɔ so, na ne ba Esarhadon sii n’ananmu dii adeɛ. Na ɔyii me nua Hanael ba Ahikar sɛ ɔnhwɛ n’ahennie mu nkontaa ne emu dwumadie nyinaa so.

22 Ahikar twitwa gyee me, na mesan baa Ninewe. Saa berɛ yi na Ahikar yɛ nsahyɛni,nsɔanokaa korafoɔ, ne nkontaa dwumadifoɔ a ɔhyɛ Asiriahene Senakerib ase; enti Esarhadon sane faa no. Na ɔyɛ me wɔfaase a ɔyɛ me ho nipa a ɔbɛne me pa ara.

Abusua afahyɛ bi

1 Na Esar-hadon ahennie berɛ soɔ no, mesane kɔɔ fie, na wɔde me yere ne me babarima Tobias sane maa me. Yɛn afahyɛ Pentekoste a ɛyɛ nnawɔtwe nson afahyɛ kronkron mu no, wɔnoaa aduane pa maa me na metenaa ase sɛ meredidi.

2 Ɛberɛ a wɔtoo me pono na wɔde aduane a ɛdɔɔso saa bɛsii m’anim no, meka kyerɛɛ me ba Tobias sɛ: Me ba, kɔfa mmɔborɔni biara a wobɛhu no wɔ yɛn nkurɔfoɔ a wɔka nnommumfoɔ ho wɔ Ninewe a ɔde n’akoma nyinaa dwene Awurade ho bra, na ɔne me mmɛdidi. Mɛtwɛn wo kɔsi sɛ wobɛsan aba.

3 Ɛno nti Tobias kɔeɛ kɔhwehwɛɛ ohiani bi wɔ yɛn nkurɔfoɔ mu. Ɛberɛ a ɔsane baeɛ no, ɔbɛkaa sɛ: Agya! Na megyee so sɛ: Menie, me ba. Ɛnna ɔtoaa so kaa sɛ: Agya, hwɛ, wɔaku yɛn nkurɔfoɔ no mu baako ato no atwene edwa so hɔ, ɔda hɔ seesei ara a wɔaku no.

4 Saa nti, mesɔre gyinaeɛ, na mesɔre firii aduane no ho a manka anhwɛ mpo, na mefaa efunu no de kɔtoo adan no baako mu kɔsi sɛ owia bɛtɔ na makɔsie no.

5 Mesan baeɛ no, mehohoroo me ho na mede awerɛhoɔ dii aduane no.

6 Ɛnna mekaee Amos nkɔmhyɛ no, sɛdeɛ ɔkasa tiaa Betel sɛ:

Mo nnapɔnna bɛdane esu,

na mo nnwom nyinaa ayɛ kwadwom.

Na mesuiɛ.

Tobit anifira

7 Na owia kɔtɔeɛ no, mekɔbɔɔ amena na mesiee efunu no.

8 Na me fipamfoɔ seree me kaa sɛ: Enti ɔda so ara nsuro? Wɔrehwehwɛ no dada aku no sɛ ɔreyɛ yei, na ɔdwaneeɛ; hwɛ, ɛnna ɔda so ara resie efunu no!

9 Saa anadwo no ara mehohoroo me ho na mekɔɔ adihɔ fasuo no ho kɔdaeɛ; na ɛsiane ahuhuro nti mankata m’anim.

10 Na mennim sɛ mpatuprɛ wɔ ɔfasuo no so; na wɔn agyanan foforɔ guu m’ani so na ɛyɛɛ so fitaa. Mekɔɔ aduruyɛfoɔ nkyɛn sɛ wɔnsa me yadeɛ, nanso mprɛ dodoɔ a wɔde aduro ka me no, na ade fitaa no yɛ m’ani so wantann de kɔsii sɛ m’ani no firaeɛ koraa. Na mfeɛ nan na mentumi nhunu hwee. M’asɛm yi yɛɛ m’abusuafoɔ nyinaa ya, na Ahikar hwɛɛ me ara mfeɛ mmienu ansa na ɔkɔɔ Elimais.

Tobit yere yɛ adwuma de hwɛ fie

11 Saa berɛ no nso, me yere Anna nyaa sika firii mmaa dwumadie mu.

12 Na ɔtaa de nnoɔma a wayɛ no kɔma ne wuranom na wɔatua no ka. Da bi, bosome Distruse da a ɛtɔ so nson no, ɔtwaa ntoma a wanwono no bi kɔmaa ne wuranom. Wɔtuaa no ka nyinaa na wɔsane kyɛɛ no abirekyie ba bi sɛ ɔnkɔkum nni.

13 Ɛberɛ a ɔsane baa me nkyɛn no, abirekyie no firii aseɛ sui. Ɛno nti mefrɛɛ no kaa sɛ: Ɛhe na wonyaa abirekyie ba yi firiiɛ? Ɛnyɛ adeɛ a ɛyɛ korɔnodeɛ, ɛnte saa? San fa kɔ ma ne wuranom; ɛsiane sɛ ɛnyɛ sɛ wɔdi adeɛ a ɛyɛ korɔno adeɛ.

14 Nanso ɔka kyerɛɛ me sɛ: Ɛyɛ akyɛdeɛ a wɔde kaa m’akatua ho maa me. Nanso mannye no anni, na meka kyerɛɛ no sɛ ɔnsan mfa nkɔma ne wuranom. Me bo fuu no ɛsiane yei nti. Ɛnna ɔbuaa me sɛ: W’adɔeɛ nnwuma no wɔ he? Wo tenenee nnwuma no wɔ he? Wɔnnim saa nnoɔma yi fa wo ho!

Tobit mpaebɔ

1 Afei mefiri yea mu mesuiɛ, na mede anibereɛ bɔɔ mpaeɛ sɛ:

2 O Awurade, wone ɔteneneeni,

wo nnwuma nyinaa yɛ tee;

w’akwan nyinaa yɛ mmɔborɔhunu ne nokorɛdie;

wobu wiase atɛn.

3 Afei, O Awurade kae me

na te w’anim kyerɛ me.

Ntwe m’aso wɔ me bɔne

ne mfomsoɔ a manyɛ no anidaho mu

ne deɛ m’agyanom yɛee no wɔ w’anim no ho.

Wɔyɛɛ bɔne tiaa wo,

4 na wɔanni wo mmara so.

Ɛno nti wode yɛn maa fomfa, nnommum ne owuo,

na woyɛɛ yɛn ɛfene ahohora mu

wɔ aman a wɔabɔ yɛn apete soɔ nyinaa mu.

5 Na afei w’atemmuo bebree yɛ nokorɛ

sɛ woretwe m’aso wɔ me bɔne ho.

Ɛfiri sɛ yɛanni wo mmara so

na yɛannante w’anim nokorɛ mu.

6 Afei wo ne me nni no sɛdeɛ wo ara wopɛ;

kasa na gye me honhom firi me mu,

na memfiri asase so nkɔdane mfuturo.

Na ɛyɛ ma me sɛ mɛwu sene sɛ mɛtena ase,

ɛfiri sɛ mate atɛnnie a ɛmfata,

na me mu yeadie no so.

Kasa na afei memfiri m’ahohiahia mu;

gyae me na menkɔ daa fie no mu,

na nnane w’ani mfiri me so, O Awurade.

Na ɛyɛ ma me sɛ mewuo

sene sɛ mɛhu amaneɛ kɛseɛ wɔ m’abrabɔ mu

na matie atɛnnie.

Sara amanehunu

7 Ɛda no ara wɔ Ekbatana a ɛwɔ Media no, ɛbaa nso sɛ Raguel babaa Sara agya mmaawa guu n’anim ase,

8 ɛfiri sɛ na wɔde no ama mmarima nson awadeɛ, na honhom bɔne Asmodeus akum wɔn nyinaa ansa na mpo wɔrebɛka ne ho sɛ ɔyerɛ. Ɛno nti mmaawa no ka kyerɛɛ no sɛ: Wo ara na woakum wo kununom! Hwɛ, woaware ekununom nson dada na wɔn mu baako mpo din nna wo so.

9 Ɛdeɛn nti na woboro yɛn yi? Ɛsiane sɛ wo kununom awuo ntira? Kɔka wɔn ho ɛ! Mma yɛnhunu wo yafunu babarima anaa ɔbaa biara da!

Sara mpaebɔ

10 Saa da no ne kra werɛ hoe na ɔsui. Ɛberɛ a ɔkɔɔ n’agya abansoro dan mu no, ɔdwenee sɛ ɔsɛne ne ho. Nanso ɔdwenee ho kaa sɛ: Wɔremmɔ m’agya ahohora bio, na wɔaka akyerɛ no sɛ: Na wowɔ ɔbabaa baako pɛ a wodɔ no, nanso n’amanehunu nti ɔsɛnee ne ho. Na mama m’agya de awerɛhoɔ asan akɔ asamando wɔ ne nkwakoraa berɛ mu. Ɛyɛ ma me sɛ mensɛne me ho, na mmom mɛbɔ Awurade mpaeɛ sɛ ebia mɛwu na mentie saa ahohora yi bio.

11 Saa berɛ no a watene ne nsa ahwɛ mpomma mu no, ɔbɔɔ mpaeɛ kaa sɛ:

Nhyira nka wo, mmɔborɔhunu Nyankopɔn!

Nhyira nka wo din daa daa;

ma wo nnwuma nyinaa nyi wo ayɛ daa.

12 Na afei, madane m’anim akyerɛ wo,

na mema m’ani so hwɛ wo.

13 Kasa na memfiri asase so

na mantie ahohora a ɛte saa bio.

14 O Owura, wonim sɛ menni fɔ

wɔ efiguo biara wɔ ɔbarima ho,

15 na mangu me

anaa m’agya din ho fi wɔ me dommum asase so.

Meyɛ m’agya ba koro;

na ɔnni ba biara a ɔbɛdi n’adeɛ,

ɔnni busuani a ɔbɛn anaa onua foforɔ bi

a mɛkora me ho ama no sɛ ɔyere.

Me kununom baason adi kan awuwu dada.

Adɛn nti na ɛsɛ sɛ metena aseɛ?

Nanso sɛ ɛnsɔ w’ani sɛ wobɛgye me nkwa afiri me nsam a,

O Awurade, ɛnneɛ tie me wɔ m’animguaseɛ mu.

Mpaebɔ ho mmuaeɛ

16 Ɛdɔn no ara mu na wɔtiee wɔn baanu no mpaeɛ yi wɔ Onyankopɔn kɛseɛ no animuonyam anim.

17 Ɛno nti wɔsomaa Rafael sɛ ɔnkɔsa wɔn baanu no yadeɛ; sɛ ɔnkɔyi adeɛ fitaa no mfiri Tobit ani so, sɛdeɛ ɛbɛyɛ a ɔde n’ani bɛhu Onyankopɔn hann; na ɔmfa Raguel babaa Sara mma Tobit ba Tobias awareɛ, na ɔnnye no mfiri honhom bɔne Asmodeus tirimuɔdenfoɔ no nsam; ɛfiri sɛ Tobias na ɛsɛ sɛ ɔware no ansa koraa na afoforɔ a wɔpɛ sɛ wɔware no no nyinaa aba. Saa berɛ no ara mu Tobit sane firi adihɔ kɔɔ ɔno ara ne fie no na Raguel babaa Sara firi abansoro dan mu sianee.

Tobit de nhyehyɛɛ ma ne babarima

1 Saa da no Tobit kaee sika a na ɔde agya Gabael wɔ Rages a ɛwɔ Media no,

2 na ɔka kyerɛɛ ne ho sɛ: Afei mafrɛ owuo ama me ho. Adɛn nti na memfrɛ me ba Tobias na menkyerɛkyerɛ no ɛfa sika no ho ansa na mawu?

3 Yei nti ɔfrɛɛ ne ba Tobias, na ɛberɛ a ɔbɛduruu ne nkyɛn no, ɔkaa sɛ: Me ba, sɛ mewu a, sie me osie pa. Di wo na ni na ntoto no ase wɔ ne nkwa nna nyinaa mu. Yɛ biribiara a ɛsɔ n’ani, na ɛnho ne werɛ wɔ biribiara mu.

4 Me ba, kae sɛ, ɔhunuu amaneɛ bebree maa wo berɛ a na woda ne yafunu mu. Sɛ ɔwu a, sie no wɔ me da ho pɛɛ.

5 Bu Awurade yɛn Nyankopɔn yie wɔ wo nkwa nna nyinaa mu, me ba, na ɛnyɛ bɔne anaa nto ne mmara. Tena ase wɔ tenenee mu, wo nkwa nna nyinaa na nante wɔ bɔne kwan so;

6 ɛfiri sɛ wɔn a wɔyɛ wɔn nnoɔma nokorɛ mu no bɛyɛ prɔmprɔm wɔn dwumadie nyinaa mu.

7 Firi w’ahonya mu kyɛ obiara a ɔyɛ setie ma Onyankopɔn nokorɛ mu no adeɛ. Nnane w’ani mfiri ohiani ho, na Onyankopɔn annane n’ani amfiri wo ho.

8 Sɛ wowɔ ahonyadeɛ bebree a, firi mu ma sɛdeɛ ɛsɛ; sɛ ɛsua a, nsuro sɛ wobɛfiri kakra a wowɔ no mu ama.

9 Saa na wobɛhyehyɛ agyapadeɛ pa ama wo ho atwɛn da a wo ho bɛkyere wo no.

10 Na adɔeɛ gye wo firi owuo mu na akora wo amma woankɔ Esum mu.

11 Ampa ara, yei yɛ afɔdeɛ a ɛkorɔn wɔ Ɔsorosoroni no anim, ma wɔn a wɔyɛ saa no nyinaa.

12 Me ba, hwɛ yie wɔ adwamammɔ ahodoɔ nyinaa ho. Deɛ ɛdi kan, nya ɔyere firi w’agyanom asefoɔ mu, na nware ɔbaa hohoɔ a ɔmfiri w’agya abusuakuo mu; ɛfiri sɛ, yɛyɛ adiyifoɔ mma. Me ba, kae sɛ, yɛn tete agyanom, Noa, Abraham, Isak ne Yakob nyinaa ware firii wɔn abusua mu. Wɔhyiraa wɔn mma, na nkyirimma bɛnya asase no.

13 Enti afei, me ba, dɔ wo nuanom, na mmu wo nuanom ne wo nkurɔfoɔ mmammarima ne wɔn mmammaa animtia wɔ w’akomam sɛ wonware ɔyere mfiri wɔn mu mma wo ho. Na ahantan mu na ɔsɛeɛ ne sakasakayɛ firie; na akwadworɔ mu wɔ ahokyere a ɛso, ɛsiane sɛ, ɛkɔm ne na ne akwadworɔ.

14 Obiara a ɔyɛ w’adwuma no, nkame no n’akatua mma adeɛ nkye so, na mmom tua no ka ntɛm; na sɛ wosom Onyankopɔn a, wobɛnya akatua. Me ba, yɛ ahwɛyie wɔ biribiara a woyɛ ho, na hyɛ wo ho so wɔ wo nneyɛɛ nyinaa mu.

15 Na deɛ wompɛ no, mfa nyɛ obi. Nnom nsa mma no mmoro so, anaa nnyegye nsaborɔ so wɔ w’akwan mu.

16 Deɛ ɛkɔm de no no, ma no aduane nni, na deɛ ɔda adagya no, fira no ntoma. Fa w’adeɛ a ɛboro soɔ no kyɛ ahiafoɔ, na sɛ wode kyɛ wie a, mma w’ani mmere akyɛdeɛ no.

17 Fa w’aduane to ɔteneneeni da so, na mmom mfa mma abɔneyɛfoɔ.

18 Hwehwɛ afotuo firi onipa nyansani biara hɔ, na mmu afotuo a mfasoɔ wɔ mu no ade hunu.

19 Ɛberɛ nyinaa hyira Awurade Nyankopɔn; bisa no ma w’atempɔn ntenetene na w’akwan ne wo nhyehyɛɛ nyinaa ayɛ prɔmprɔm. Ɛsiane sɛ, amanaman no mu biara nni nteaseɛ; nanso Awurade ankasa na ɔma afotu pa nyinaa; na ne pɛ mu no, ɔbrɛ obiara a ɔno ara pɛ ase.

Saa nti, me ba, kae me mmara, na mma no mpopa mfiri w’adwene mu.

Sika a ɔde gyaa Gabael

20 Afei, me ba, ma menkyerɛkyerɛ wo mfa nnwetɛbena du a mede gyaa Gabrias ba Gabael wɔ Rages a ɛwɔ Media no.

21 Me ba, nsuro, ɛsiane sɛ ohia aka yɛn nti. Wowɔ ahonya kɛseɛ, sɛ wosuro Onyankopɔn na woyi wo ho firi bɔne nyinaa ho na woyɛ adeɛ a ɛsɔ n’ani.

Ɔbɔfoɔ Rafael

1 Ɛnna Tobias buaa n’agya Tobit sɛ: Agya, mɛyɛ deɛ woahyɛ me no nyinaa;

2 nanso ɛbɛyɛ dɛn na me nsa aka sika no, wɔ berɛ a mennim ɔbarima no na ɔno nso nnim me? Adanseɛ bɛn na mede bɛma no a ɔbɛhu me na wagye me ato mu, na ɔde sika no ama me? Bio, mennim ɔkwan a wɔde kɔ Media no, anaasɛ sɛdeɛ wɔsi kɔ hɔ.

3 Ɛnna Tobit buaa ne ba Tobias sɛ: Ɔde ne sika-gyeɛ krataa no maa me na me nso mede me deɛ maa no. Mekyɛɛ ne deɛ no mu mmienu; maa obiara faa baako, na mede baako kaa sika no ho. Na afei mfeɛ aduonu atwa mu ni a mede sika no maa no. Enti afei me ba, hwehwɛ onipa bi a ɔyɛ ɔnokwafoɔ na wone no nkɔ, na mosan ba a, yɛbɛtua no ka. Na sika no deɛ kɔgye firi Gabael hɔ.

4 Enti Tobias siim sɛ ɔrekɔhwehwɛ onipa bi na ɔne no akɔ Media, obi a ɔnim ɔkwan no so yie. Ɔfirii adi na ɔkɔhunuu Ɔbɔfoɔ Rafael sɛ ɔgyina n’anim; nanso wanhunu sɛ ɔyɛ Onyankopɔn bɔfoɔ.

5 Tobias ka kyerɛɛ no sɛ: Aberanteɛ, ɛhefa na wofire? Ɔbuaa sɛ: Mefiri wo nuanom Israelfoɔ no mu, na maba ɛha sɛ merebɛyɛ adwuma. Ɛnna Tobias ka kyerɛɛ no sɛ: Wonim ɔkwan a wɔde kɔ Media no anaa?

6 Ɔbɔfoɔ no buaa no sɛ: Aane, makɔ hɔ mprɛ bebree; menim hɔ yie na menim akwan no nyinaa so. Metaa tu kwan kɔ Media, na ɛyɛ a mekɔtena yɛn nua Gabael nkyɛn wɔ Rages a ɛwɔ Media no. Ɛfiri Ekbatana rekɔ Rages no yɛ nnanu akwantuo; ɛfiri sɛ ɛda mmepɔ mu, ɛnna Ekbatana nso da mfimfini wɔ petee no mu.

7 Ɛnna Tobias see no sɛ: Twɛn me ɛ, aberanteɛ, kɔsi sɛ mɛkɔ akɔbɔ m’agya amanneɛ; ɛfiri sɛ mehia wo sɛ mene wo bɛtu kwan no, na mɛtua wo ka.

8 Ɔbɔfoɔ no buaa sɛ: Ɛyɛ, mɛtwɛn; na mmom hwɛ na woankyɛ pii.

9 Enti Tobias kɔe kɔka kyerɛɛ n’agya Tobit na ɔka kyerɛɛ no sɛ: Makɔnya ɔbarima bi a ɔte sɛ yɛn nuanom Israelfoɔ yi ara bi! Tobit ka kyerɛɛ no sɛ: Me ba, frɛ ɔbarima no bra mu, sɛdeɛ ɛbɛyɛ na mɛhu ne nkurɔfoɔ ne abusua a ɔfiri mu, ɛnna afei nso sɛ ɔyɛ ɔnokwafoɔ a ɔbɛtumi ne wo akorɔ.

10 Ɛnna Tobit firii adi frɛɛ no kaa sɛ: Aberanteɛ, m’agya refrɛ wo. Ɛno nti ɔhyɛnee mu kɔɔ ne nkyɛn, na Tobit dii kan kyeaa no. Ɔgyee so sɛ: Anigyeɛ nkyea mmra wo nkyɛn! Nanso Tobit de nsɛnkwaa yii ano sɛ: Anigyeɛ bɛn na ɛwɔ hɔ ma me bio? Meyɛ onipa a menni ani; Mentumi nhunu ɔsoro hann, nanso meda esum mu te sɛ owufoɔ a ɔntumi nhunu hann bio. Mete ase deɛ, nanso fanyinam sɛ mawuo. Mete nnipa nka nanso menhu wɔn. Nanso Aberanteɛ no ka kyerɛɛ no sɛ: Mmɔ hu, na ɛberɛ abɛn sɛ Onyankopɔn sa wo yadeɛ, nsuro. Ɛnna Tobit ka kyerɛɛ no sɛ: Me ba, Tobias pɛ sɛ ɔkɔ Media. Wobɛtumi ne no akɔ sɛ ɔkwankyerɛfoɔ anaa? Mɛtua wo ka, me nua. Rafael buaa sɛ: Mɛtumi ne no akɔ na menim akwan no nyinaa, ɛsiane sɛ na metaa kɔ Media na matwam afa ne petee mu hɔ nyinaa, na menim mmepɔ no ne akwan a ɛkɔ hɔ no nyinaa.

11 Ɛnna Tobit ka kyerɛɛ no sɛ: Onua, abusua ne ɔman bɛn mu na wofire? Onua, ka kyerɛ me ɛ.

12 Rafael bisaa sɛ: Adɛn nti na wopɛ sɛ wohu ɔman a mefiri mu? Ɛnna Tobit kaa sɛ: Mepɛ sɛ mehu pa ara, onua, sɛ hwan na ne ba ne woɔ, ɛne wo din.

13 Rafael buaa sɛ: Mene Asaria, Ananias a ɔyɛ okunini ne wo busuani no ba.

14 Afei Tobit ka kyerɛɛ no sɛ: Akwaaba! Onyankopɔn agye wo, me nua. Mma wo bo mfu me, sɛ mepɛɛ sɛ mɛhu wo nananom. Woyɛ me busuani, na wofiri abusua dua a ɛwɔ animuonyam na ɛyɛ mu. Ɛsiane sɛ na menim Hanania ne Natan, Semais mmammarima baanu no, na wɔtaa ne me kɔ Yerusalem kɔsom wɔ hɔ, na wɔammane amfa mfomsoɔ kwan no so. Wo nkurɔfoɔ yɛ nnipa papa, na wofiri abusua papa mu. Akwaaba!

15 Ɛnna ɔtoaa so kaa sɛ: Mede da koro ɔpaani akatua bɛma wo, na afei mɛtua wo ne me ba no ho ka. Enti wo ne me ba no nkɔ,

16 namede akatua no bi bɛka wo ho. Rafael buaa sɛ: Mene no bɛkɔ; enti mɛnsuro. Yɛbɛkɔ asan aba no wɔ akwanhosan mu, ɛsiane sɛ ɔkwan no mu dwo.

17 Ɛno nti Tobit ka kyerɛɛ no sɛ: Nhyira nka wo, me nua.

Ɛnna afei ɔfrɛɛ ne ba no ka kyerɛɛ no sɛ: Ɔba, siesie ɔkwan so aduane na wone wo nua nkɔ. Ɔsoro Nyankopɔn mfa mo nkɔ na ɔnsan mfa mo mmɛduru akwanhosan mu mmrɛ me; na me ba, ne bɔfoɔ nka mo baanu ho mfa mo nkɔ dwoodwoo.

Na ansa na ɔrebɛtu ne kwan no, ɔfee n’agya ne ne na ano. Afei Tobit ka kyerɛɛ no sɛ: Monnante yie.

18 Nanso ne na hyɛɛ aseɛ suiɛ, na ɔka kyerɛɛ Tobit sɛ: Adɛn nti na woasoma yɛn abɔfra yi ama no korɔ? Ɛnyɛ oyi ne poma a ɔkura yɛn a, ɔdi yɛn anim kɔ ba anaa?

19 Mfa sika mpee sika so, na mmom ma ɛnyɛ agyedeɛ mma yɛn ba no.

20 Na nkwa a Awurade de ama yɛn dɔɔso ma yɛn.

21 Ɛnna Tobit ka kyerɛɛ no sɛ: Nha wo ho; na ɔbɛkɔ asan aba wɔ akwanhosan mu. Nkasa bio! Me nuabaa, nsuro mma wɔn.

22 Na ɔbɔfoɔ pa ne no bɛkɔ; n’akwantuo no bɛyɛ prɔmprɔm, na ɔbɛsane aba wɔ akwanhosan mu.

1 Ɛno nti ɔgyae su.

Wɔtu kwan kɔ Rages

Aberantewaa no siim kɔe a na ɔbɔfoɔ no ka ne ho;

2 na ɔkraman firii adi bɛkaa wɔn ho ne wɔn kɔeɛ. Yei nti wɔn baanu bɔɔ anan kɔeɛ, na ɛberɛ a anadwo a ɛdi kan too wɔn no, wɔbɔɔ sese wɔ Asubɔnten Tigris ho.

3 Ɛnna aberanteɛ no siane kɔɔ sɛ ɔrekɔhohoro ne nan ase wɔ Asubɔnten Tigris mu. Mpofirim ara na apataa kɛseɛ bi huri firii nsuo no mu bɔɔ mmɔden sɛ anka ɔrebɛmene aberantewaa no nan, na ɔteaa mu.

4 Nanso ɔbɔfoɔ no ka kyerɛɛ aberantewaa no sɛ: Kye apataa no na kɔ so ara sɔ ne mu! Ɛnna aberanteɛ no sɔɔ apataa no mu na ɔtoo no twenee asase so.

5 Afei ɔbɔfoɔ no see no sɛ: Pae apataa no mu na yi ne bɔnwoma, ne korona ne ne berɛboɔ no. Ma yeinom nka wo hɔ, na to ne nsono no gu. Na ne bɔnwoma, ne korona ne ne berɛboɔ yɛ aduro.

6 Ɛno nti aberanteɛ no paee apataa no mu no, ɔboaboaa bɔnwoma, korona ne berɛboɔ no ano; ɛnna afei ɔtotoo apataa no, na ɔdii bi, na ɔde bi too hɔ sɛ ɔbɛhyɛ no nkyene.

Nnipa baanu no toaa wɔn akwantuo no so kɔsii sɛ wɔbɛnee Media.

7 Aberantewaa no bisaa ɔbɔfoɔ no sɛ: Onua Asaria, ɛdeɛn aduro na ɛwɔ apataa no korona, ne berɛboɔ ne ne bɔnwoma no mu?

8 Ɔbɔfoɔ no buaa sɛ: Ɛyɛ apataa no korona ne ne berɛboɔ no deɛ, ɛsɛ sɛ wohye ma ɛyɛ wisie wɔ ɔbarima anaa ɔbaa a honhom fi anaa honhom bɔne bi teetee no anim, na ateetee biara bɛdwane a ɛnsan mmɛtena onipa no so bio.

9 Na ɛyɛ bɔnwoma no nso, fa sra onipa a adeɛ fitaa ada n’ani so, hu mframa gu adeɛ fitaa no so na n’ani no bɛte.

Rafael Nhyehyɛɛ

10 Ɛberɛ a ɔhyɛnee Media a na afei ɔrebɛn Ekbatana no,

11 Rafael see aberanteɛ no sɛ: Onua Tobias. Ɔgyee so sɛ: Me nie. Ɛnna afei Rafael ka kyerɛɛ no sɛ: Anadwo yi yɛbɛsoɛ wɔ Raguel fie. Ɔyɛ wo busuani, na ɔwɔ babaa bi a wɔfrɛ no Sara.

12 Ɔnni ɔbarima ɔdedifoɔ ne ɔbabaa gye Sara nko ara ne wo ho, a sɛ Sara nni hɔ a ɔdi adeɛ, na ansa na mmarima afoforɔ afa no sɛ awunyadeɛ. Bio nso, wowɔ ho kwan sɛ wodi n’agya adeɛ. Deɛ ɛka ho bio ne sɛ, abaayewa no nim nyansa, ɔwɔ akokoɔduro, ne ho yɛ fɛ na n’agya yɛ onipa pa.

13 Ɔtoaa so sɛ: Wowɔ ho kwan sɛ wofa no sɛ ɔyere. Ɛno nti tie me, onua; anadwo yi mene n’agya bɛkasa afa ababaa no ho, sɛdeɛ ɛbɛyɛ a yɛbɛfa no ayɛ wo yere. Ɛberɛ a yɛbɛsan afiri Rages aba no, na yɛrebɛhyia no ayeforɔ. Na menim sɛdeɛ Mose mmara kyerɛ no, Raguel ntumi nsiane wo ho mfa no nkɔma ɔbarima foforɔ wɔ berɛ a ɔnkɔtwetwe owuo mma ne ho. Ɔnim nokorɛ mu pa ara sɛ w’akyi no, ɛnsɛ sɛ ɔbarima foforɔ biara ware ne babaa no. Enti afei tie me, onua, na anadwo yi yɛne no bɛkasa afa ababaa no ho na yɛagye no awadeɛ ama wo. Na ɛberɛ a yɛbɛsan afiri Rages aba no, yɛbɛfa no na yɛde no asan aka yɛn ho aba wo fie.

14 Ɛnna Tobias bua see Rafael sɛ: Onua Asarias, mate sɛ wɔde no ama mmarima nson awadeɛ dada, na wɔn mu biara wuu wɔ ayeforɔ pia mu. Anadwo a wɔkɔ ne nkyɛn no, na wɔawu. Mate sɛ nkurɔfoɔ reka sɛ ɛyɛ honhommɔne bi na ɛkumm wɔn. Enti afei mesuro sɛ mɛwu ama m’agya ne me na de awerɛhoɔ akɔ asamando, ɛsiane me nti. Na wɔnnya ɔba biara a ɔbɛsie wɔn.

15 Ɔnni obiara awu ka wɔn a wɔba abaayewa no nkyɛn nko ara. Na seesei ara, ɛsiane sɛ me nko ara ne m’agya babarima, enti mesuro sɛ mɛwu na ɛde m’agya ne me na de awerɛhoɔ bɛsiane akɔ asamando, ɛfiri sɛ, wɔnni ɔbabarima biara a ɔbɛsie wɔn.

16 Na Rafael ka kyerɛɛ no sɛ: Wokae nsɛm a w’agya de hyɛɛ wo sɛ fa ɔyere firi w’agya fie mu no? Onua, afei tie me, na nkasa bio mfa saa honhommɔne yi ho. Fa no. Menim sɛ anadwo yi ara wɔde no bɛma wo awadeɛ.

17 Sɛ woduru ayeforɔ pia mu hɔ a, fa aduhwan a egya wɔ mu na fa apataa korona ne berɛboɔ no bi gu so. Ehwa bi bɛfiri mu aba;

18 honhommɔne no bɛte pampan no nka na wadwane, na ɔrensane mmɛn no bio. Na sɛ wone no rebɛda a, monni kan nsɔre na mommɔ mpaeɛ nsrɛ ɔsoro Awurade no hɔ mmɔborɔhunu ne banbɔ. Nsuro, na wɔahyehyɛ ato hɔ sɛ ɔnyɛ wo dea ansa na wɔrebɔ wiase. Wobɛgye no, na ɔne wo akɔ, na mesusu sɛ wone no bɛwo mma, na wɔbɛyɛ sɛ anuanom ama wo. Afei ɛnkasa bio! Ɛberɛ a Tobias tee Rafael nsɛm yi no, na ɔhunuu sɛ ɔfiri n’agya abusua mu no, ɔde n’akoma dɔɔ no na ɔnyaa ne ho akɔnnɔ dendeenden.

Wɔkɔduru Raguel fie

1 Afei ɛberɛ a wɔhyɛnee Ekbatana no, Tobias ka kyerɛɛ no sɛ: Onua Asaria, fa me kɔ yɛn nua Raguel hɔ. Ɛno nti ɔde no kɔɔ Raguel fie, na wɔhunuu no sɛ ɔte adihɔ pono no nkyɛn. Wɔdii kan kyeaa no, na ɔgyee so sɛ: Anigyeɛ nkyea, anuanom; akwaaba ne akwanhosan! Afei ɔde wɔn hyɛnee ne fie.

2 Ɛnna Raguel ka kyerɛɛ ne yere Edna sɛ: Hwɛ sɛdeɛ aberanteɛ yi sɛ me nua Tobit!

3 Afei Edna bisaa wɔn sɛ: Anuanom, ɛhefa na mofiri? Wɔbuaa no sɛ: Yɛyɛ Naftali asefoɔ a yɛka wɔn a wɔwɔ nnommum mu wɔ Ninewe ho.

4 Ɛnna ɔbisaa wɔn sɛ: Monim yɛn nuabarima Tobit anaa? Wɔbuaa sɛ: Aane, yɛnim no. Na ɔbisaa wɔn sɛ: Ne ho yɛ anaa?

5 Wɔbuaa sɛ: Ɔte ase, na ne ho yɛ. Ɛnna Tobias de kaa ho sɛ: M’agya ne no!

6 Ɛnna Raguel huri gyinaeɛ na ɔfee n’ano na ɔsuiɛ.

7 Na ɔsan kaa nsɛm yi kyerɛɛ no sɛ: Nhyira ne wo, me ba, onipa pa ne onimuonyamfoɔ ba!O amanehunu kɛseɛ pa ara na ama onipa teneneeni ne ɔdɛɛfoɔ sei ani afira yi! Ɛnna afei ɔbamm ne busuani Tobias na ɔsui.

8 Na ne yere Edna ne ne babaa Sara nso suiɛ.

Tobias ne Sara awareɛ

9 Na Raguel de anigyeɛ gyee wɔn; na ɔkumm odwennini wɔ nnwankuo mu maa wɔn. Ɛberɛ a wɔhohoroo wɔn ho wieeɛ na wɔtenaa ase sɛ wɔredidi no, Tobias ka kyerɛɛ Rafael sɛ: Onua Asarias, ka kyerɛ Raguel sɛ ɔmfa me busuani Sara mma me nware.

10 Na Raguel tee asɛm yi na ɔka kyerɛɛ aberanteɛ no sɛ: Didi na nom, na ma w’ani nnye anadwo yi. Ɛfiri sɛ, me nua, obiara nni ho kwan sɛ ɔware me babaa Sara ka wo ho. Saa ara nso na menni ho kwan sɛ mede no bɛma ɔbarima biara gye sɛ wo, ɛfiri sɛ woyɛ me busuani a wobɛn me. Nanso, me ba, ma menkyerɛkyerɛ nokorɛ pa ara ɛwɔ asɛm no mu nkyerɛ wo.

11 Mede no ama yɛn abusua mu mmarima baason, na sɛ wɔn mu biara ba ne ho anadwo a, ɔwu. Nanso seesei ara deɛ, me ba, didi na nom na Awurade bɛdi ama mo baanu yi. Nanso Tobias kaa sɛ: Merennidi anaa merennom biribiara kɔsi sɛ wone me bɛsi agyinaeɛ wɔ asɛm no ho. Saa nti Raguel kaa sɛ: Mɛyɛ saa. Fa no yɛ wo yere sɛdeɛ mmara no kyerɛ wɔ Mose nwoma no mu, na wɔahyɛ afiri soro sɛ wɔmfa no mma wo. Fa wo busuani baa no; ɛfiri nnɛ rekorɔ, woyɛ ne nuabarima na ɔyɛ wo nuabaa. Ɛfiri nnɛ rekorɔ wɔde no ama wo. Me ba, ɔsoro Awurade mmɔborɔhunu ne n’asomdwoeɛ nhwɛ mo so na ɛnsi mo yie anadwo yi.

12 Afei Raguel frɛɛ ne babaa Sara. Na ɔbɛduruu ne nkyɛn no, Raguel sɔɔ ne nsa de no maa Tobias, na ɔkaa sɛ: Fa no yɛ wo yere sɛdeɛ mmara ne ahyɛdeɛ a wɔatwerɛ no wɔ Mose nwoma mu no teɛ. Fa no ne no nkɔ w’agya hɔ dwoodwoo. Na ɔsoro Nyankopɔn asomdwoeɛ mma no nsi mo yie wɔ mo akwantuo mu.

13 Afei ɔfrɛɛ ababaa no na na ɔka kyerɛɛ no sɛ ɔmfa nwoma mmra; na ɔtwerɛɛ awadeɛ no ho nhyehyɛɛ firii mu, sɛ ɔde Sara ama Tobias sɛ ne yere sɛdeɛ ahyɛdeɛ a ɛwɔ Mose mmara no mu teɛ no.

14 Ɛnna afei ɔfirii aseɛ didi nnomeeɛ.

15 Raguel frɛɛ ne yere Edna na ɔka kyerɛɛ no sɛ: Siesie ɛdan baako mu na fa Sara kɔ hɔ.

16 Ɛno nti ɔkɔ kɔtoo mpa wɔ ɛdan no mu sɛdeɛ na waka akyerɛ no no, na ɔde Sara baa hɔ. Edna sui maa ne babaa no. Afei ɔpepaa ne nisuo no, na ɔka kyerɛɛ ne babaa no sɛ: Nsuro, me ba; ɔsoro Awurade no mma wo anigyeɛ nsi w’awerɛhoɔ ananmu. Nsuro, me ba. Afei ɔfirii adi.

Tobias pamo honhommɔne no

1 Ɛberɛ a wɔdidi na wɔnom wieeɛ no, wɔpɛɛ sɛ wɔda; ɛno nti wɔfaa aberanteɛ no de no kɔɔ piadan no mu hɔ.

2 Afei Tobias kae Rafael nsɛm no, na ɔyii apataa berɛboɔ ne ne korona no firii kotokuo a wakora no wɔ mu no, na ɔde aduhwam gya guu so.

3 Na apataa no hwam no pamm honhommɔne no kɔɔ akyirikyiri baabi wɔ Misraim. Nanso Rafael dii n’akyi, na ɔkyekyeree ne nsa ne ne nan boom.

4 Ɛberɛ a na awofoɔ no kɔ na wɔaka ɛdan no pono ato mu no, Tobias sɔre firii mpa no so na ɔka kyerɛɛ Sara sɛ: Onua, sɔre ɛ, na yɛmmɔ mpaeɛ sɛdeɛ Awurade bɛhu yɛn mmɔbɔ na wama yɛn asomdwoeɛ.

5 Ɛno nti ɔsɔree, na wɔfirii aseɛ bɔɔ mpaeɛ srɛɛ sɛdeɛ ɛbɛyɛ a wɔn ho bɛdwo wɔn. Tobias firii aseɛ kaa sɛ:

O yɛn agyanom Nyankopɔn, nhyira nka wo,

nhyira nka wo din no wɔ awoɔ ntoatoasoɔ nyinaa mu daa.

Ma ɔsoro ne abɔdeɛ nyinaa nhyira wo daa.

6 Wo na wobɔɔ Adam na wode Hawa maa no sɛ ne yere,

sɛ ɔboafoɔ ne sɔmufoɔ.

Wɔn mu na adasamma firi baeɛ.

Ɛyɛ wo na wokaa sɛ: Ɛnyɛ sɛ onipa nko tena;

momma yɛnyɛ ne nsɛsoɔ boafoɔ mma no.

7 Na afei, merefa me busuani baa yi,

ɛnyɛ sɛ akɔnnɔ ntira,

na mmom nokorɛ mu.

Hu me ne no mmɔbɔ

na ma yɛn baanu nyinaa mmom nyini nkyɛ.

8 Na wɔn baanu no kaa sɛ: Amen, Amen.

9 Ɛnna wɔkɔdaeɛ anadwo no.

Nanso Raguel sɔreeɛ na ɔfrɛɛ n’asomfoɔ baeɛ, na wɔkɔbɔɔ damena,

10 ɛfiri sɛ ɔkaa sɛ: Ɛbɛtumi aba sɛ ɔno nso bɛwu na ama yɛn abɛyɛ aseredeɛ ne fɛwdideɛ.

11 Na ɛberɛ a wɔwiee damena no bɔ no, Raguel kɔɔ ne fie na ɔfrɛɛ ne yere,

12 na ɔka kyerɛɛ no sɛ: Soma wo mmaawa no mu baako ma no nkɔhwɛ sɛ ɔte ase anaa? Na sɛ wawu a, na yɛasie no wɔ berɛ a obiara nhunu.

13 Ɛno nti wɔsomaa abaawa no, ɔsɔɔ kanea na ɔbuee ɛpono no; na ɔhyɛnee mu, na ɔhunuu wɔn baanu sɛ wɔadeda.

14 Ɛnna afei abaawa no firii adie bɛka kyerɛɛ wɔn sɛ ɔte ase na biribi bɔne biara nsiiɛ.

15 Afei wɔhyiraa ɔsoro Nyankopɔn, na Raguel kaa sɛ:

Nhyira nka wo, O Onyankopɔn, nhyira biara a ɛho teɛ;

ma wɔn a wɔayi wɔn nyinaa nhyira wo.

Ma wɔnhyira wo daa.

16 Nhyira nka wo, ɛfiri sɛ wo na woama masere.

Anyɛ sɛdeɛ mehwɛɛ anim kwan no,

nanso wo ne me adi no sɛdeɛ wo mmɔborɔhunu a ɛso no teɛ.

17 Nhyira nka wo, ɛfiri sɛ woahunu

mma baanu pɛ yi mmɔbɔ.

O Owura, hu wɔn mmɔbɔ, na kora wɔn dwoodwoo;

na ma wɔn asetena nwie mudie

wɔ anigyeɛ ne mmɔborɔhunu mu.

18 Afei ɔhyɛɛ n’asomfoɔ no sɛ wɔnsi adamena no ansa na owia apue.

Ayeforɔhyia apontoɔ

19 Yei akyiri no, ɔka kyerɛɛ ne yere sɛ ɔnto paanoo bebree; na ɔfirii adi kɔɔ mmoakuo no mu kɔfaa nantwinini mmienu a wɔasa wɔn ne nnwennini nan, na ɔhyɛɛ sɛ wɔnku wɔn. Ɛno nti wɔfirii aseɛ yɛɛ ahosiesie.

20 Ɛnna afei ɔfrɛɛ Tobias na ɔde nsɛm yi kaa no ntam sɛ: Wɔremfiri ha kɔsi dadu nnanan ansa, na mmom wobɛtena me nkyɛn ha adidi na wanom; na wobɛkyekyere me babaa a na anka ne werɛ ahoɔ no werɛ.

21 Ntɛm ara fa deɛ mewɔ no mu fa na san kɔ w’agya nkyɛn dwoodwoo; ɛfa a aka no bɛyɛ wo dea ɛberɛ a mene me yere bɛwuo no. Nsuro, me ba. Meyɛ w’agya na Edna nso yɛ wo na, na ɛfiri saa berɛ yi korɔ yɛyɛ wo dea te sɛ wo yere no kɔsi daa. Nsuro, me ba.

Wɔn nsa ka sika no

1 Na Tobias frɛɛ Rafael na ɔka kyerɛɛ no sɛ:

2 Onua Asarias, fa asomfoɔ baanan ne mfunumupɔnkɔ mmienu ka wo ho na kɔ Rages. Kɔ Gabael fie, na fa sikatua krataa no ma no, na gye sika no, na fa no bra ayeforɔ no ase.

3 Wodi adanseɛ sɛ Raguel aka ntam, na ɛnsɛ sɛ meto ne ntam no.

4 Na wonim sɛ m’agya nso ani rehwɛ kwan, na sɛ mekyɛre di da koro mpo a, ɛbɛha no pii.

5 Saa nti Rafael faa asomfoɔ nan ne yoma mmienu no de kɔɔ Media, na ɔkɔsoɛɛ Gabael. Rafael de sikatua krataa no maa no na ɔka kyerɛɛ no sɛ Tobit ba Tobias aware na wato ne nsa afrɛ no sɛ ɔmmra ayeforɔhyia no ase. Ɛno nti Gabael sɔree na ɔkanee sika mmɔtɔ no maa no, a emu biara nsɔano da so ara wɔ hɔ; ɛnna afei wɔhyehyɛ guu yoma no so.

6 Anɔpa no, wɔn baanu sɔree ahema baa ayeforɔ no ase. Wɔbɛduruu Raguel fie no, wɔhunuu Tobias sɛ ɔte didipono ho. Ɔsɔre gyinae na ɔkyeaa Gabael. Gabael de nisuo hyiraa Tobias kaa sɛ: Ɔba pa ne onimuonyamfoɔ a n’agya yɛ onipa pa, onimuonyamfoɔ, teneneeni ne ɔyamyɛni! Awurade mfa ɔsoro nhyira nhyira wo ne wo yere, ne wo yere agya ne ne na. Nhyira nka Onyankopɔn, ɛfiri sɛ mehunu me nua Tobit suban bi wɔ Tobias mu.

Awofoɔ no teetee

1 Afei na da biara da na Tobit rebu nna dodoɔ a Tobias de bɛtu kwan no na wasan ba. Na nna no soeɛ na ne ba no amma no,

2 ɔkaa sɛ: Ɛbɛtumi aba sɛ wɔakyere no anaa? Anaasɛ, ɛntumi mma sɛ Gabael awu na obiara nni hɔ a ɔde sika no bɛma no?

3 Afei ɔfirii aseɛ teeteeɛ.

4 Ne yere kaa sɛ: Me ba no awu a seesei ɔnka ateasefoɔ ho bio. Enti ɔfirii aseɛ suu no, na ɔkaa sɛ:

5 Mennue, me ba, wo ne m’ani kanea, a mama woatu kwan yi.

6 Nanso Tobit ka kyerɛɛ no sɛ: Yɛ komm na gyae su no, me dɔfo; na ne ho yɛ. Ebia na mpofirim na biribi asi wɔ hɔ. Onipa a ɔne no kɔeɛ no yɛ nokwafoɔ, na ɔyɛ yɛn busuani. Me dɔfo, mma wo werɛ nho ne nti; na ɛrenkyɛ ɔbɛduru ha.

7 Na ne yere kaa sɛ: Wo ara nso yɛ komm! Gyae sɛ woredaadaa me no! Me ba no nte ase. Na daa ɔsi kwan a ne ba no nam so kɔeɛ no so; na ɔntie obiara asɛm. Sɛ owia kɔtɔ a, ɔkɔhyɛ dan mu di abooboo su anadwo no nyinaa, a ɔnna mpo.

Tobias ne Sara si kwan so rekɔ fie

Afei dadu nnanan a Raguel kaa ntam sɛ ɔde hyɛ awareɛ no ho fa ama ne babaa no duruiɛ no, Tobias baa ne nkyɛn bɛkaa sɛ: Gya me kwan na menkɔ, ɛfiri sɛ m’agya ne me na nni anidasoɔ sɛ wɔbɛsane ahunu me bio. Enti agya, mesrɛ wo ara gya me kwan na mensan nkɔ m’ankasa m’agya nkyɛn. Madi kan akyerɛkyerɛ mu akyerɛ wo sɛdeɛ mesi gyaa no hɔ.

8 Nanso Raguel ka kyerɛɛ Tobias sɛ: Tena me nkyɛn, me ba; na mɛsoma abɔfoɔ akɔ w’agya nkyɛn, na wɔakɔka akyerɛ no sɛdeɛ wo ho teɛ.

9 Tobias buaa no sɛ: Dabi, gya me kwan ma menkɔ m’agya hɔ.

10 Enti Raguel yɛɛ ntɛm de ne yere Sara ne n’agyapadeɛ mu fa: Nkoa ne mfenaa, anantwie ne nnwan, mfunumu ne yoma, ntoma, sika, ne efie nnoɔma maa Tobias.

11 Ɛnna afei ɔgyaa wɔn kwan dwoodwoo; na ɔyɛɛ Tobias atuu kaa sɛ: Me ba, nante yie; ɔkwan so kosɛkosɛ. Ɔsoro Nyankopɔn bɛma wo ne wo yere Sara anya mo ho, na mɛhu mo mma ansa na mawu.

12 Afei ɔfee ne babaa Sara ano na ɔka kyerɛɛ no sɛ: Me ba, di w’ase barima ne w’ase baa ni, ɛfiri seesei rekorɔ wɔyɛ w’awofoɔ te sɛ wɔn a wɔwoo woɔ no ara. Ɔba, fa asomdwoeɛ kɔ, na ma mente wo ho asɛm pa ɛberɛ a meda so te aseɛ yi. Afei ɔmaa wɔn nante yie na ɔgyaa wɔn maa wɔkɔe. Ɛnna Edna ka kyerɛɛ Tobias sɛ: Me ba ne onua dɔfo, ɔsoro Nyankopɔn mfa wo nkɔduru dwoodwoo, na ɔmma menhunu mma a wo ne me babaa Sara bɛwoɔ, ansa na mawu. Awurade anim na mede me babaa mema wo; nyɛ biribiara mfa nho ne werɛ. Me ba, fa asomdwoeɛ kɔ. Ɛfiri saa berɛ yi rekorɔ, meyɛ wo na, na Sara nso yɛ wo yere dɔfo. Yɛn nyinaa nni yie wɔ yɛn nkwa nna nyinaa mu. Afei ɔfee wɔn baanu ano na ɔgyaa wɔn kwan maa wɔkɔɔ dwoodwoo.

13 Tobias de anigyeɛ ne ahurisie ne Raguel dii ntetemu, na ɔyii ɔsoro ne asase Awurade, adeɛ nyinaa so Hene no ayɛ, ɛfiri sɛ wama n’akwantuo no ayɛ nkonimdie. Akyire koraa no, ɔhyiraa Raguel ne ne yere Edna, na ɔkaa sɛ: Awurade ahyɛ me sɛ menni mo ni wɔ me nkwa nna nyinaa mu.