Category: 2 Makabee

Yuda Makabeus di Lisias so nkonim

1 Yei akyi no, ankyɛre biara na Lisias a ɔyɛ ɔhene hwɛfoɔ ne ne busuani no, ɔno ne deɛ na amammuo hyɛ ne nsa no, ne bu fui ɛsiane deɛ na asie no nti,

2 ɔboaboaa asraafoɔ a wɔnam anammɔn mu bɛyɛ mpem nwɔtwe ne n’apɔnkɔsotefoɔ nyinaa ano de kɔɔ Yudafoɔ no so. Adwene a ɔnyaeɛ ne sɛ ɔbɛma kuro no ayɛ Helafoɔ kuro,

3 na wagye ɛtoɔ wɔ asɔredan no mu sɛdeɛ ɔyɛeɛ wɔ akronkron mmeaeɛ wɔ aman afoforɔ soɔ no, na watɔn ɔsɔfo panin dibea no afe biara.

4 Wammu Onyankopɔn tumi no, na mmom n’ani gyee mmorosoɔ wɔ n’asraafoɔ a wɔnam anammɔn mu mpem nwɔtwe, ne n’apɔnkɔsotefoɔ apem, ne asono aduɔwɔtwe a ɔwɔ no ho.

5 Ɔretua Yudea no, ɔbɛnee Bet-sur, a ɛyɛ beaeɛ a wɔabɔ ho ban na ɛbɛyɛ agoprama bɛyɛ nnum a wɔaka abom firi Yerusalem, na ɔtuaa no dendeenden.

6 Ɛberɛ a Makabeus ne ne mmarima no tee sɛ Lisias retua abandenden no, wɔn ne nkurɔfoɔ no nyinaa, de adwotwa ne nisuo bɔɔ Awurade mpaeɛ sɛ ɔnsoma ɔbɔfoɔ pa ma ɔmmɛgye Israel.

7 Makabeus no ara ankasa ne deɛ ɔdii kan miaeɛ, na ɔhyɛɛ afoforɔ no nkuran sɛ wɔn ne no mfa wɔn nkwa nto hɔ mfa mmoa wɔn nuanom no.

8 Na ɛberɛ a wɔda so wɔ hɔ a wɔbɛn Yerusalem no, ɔpɔnkɔsoteni bi pue firii wɔn anim a ɔhyɛ atadeɛ fitaa na ɔnyinamnyinam sika akodeɛ.

9 Na wɔn nyinaa boom yii mmɔborɔhunu Nyankopɔn no ayɛ, na wɔhyɛɛ wɔn akoma den, wɔyɛɛ krado sɛ ɛnyɛ nnipa nko ara na wɔretua wɔn na mmom mmoa aniɛdenfoɔ ne afasuo a wɔde dadeɛ ayɛ nyinaa.

10 Wɔtu tenee wɔ ɔko nhyehyɛɛ mu, na wɔwɔ wɔn ɔsoro boafoɔ, ɛfiri sɛ Awurade hunuu wɔn mmɔbɔ.

11 Wɔtotoo wɔn ho sɛ agyata guu ɔtamfo no so, na wɔkunkum nnipa mpem dubaako ne apɔnkɔsotefoɔ apem ahansia, na wɔhyɛɛ nkaeɛ maa wɔdwaneeɛ.

12 Wɔn mu bebree de adagya ne apira dwaneeɛ, na Lisias ankasa ne animguaseɛ dwanee.

Lisias ne Yudafoɔ no nya asomdwoeɛ

13 Na ɛsiane sɛ na ɔyɛ ɔbadwemma nti, ɔdwenee nkoguo a na abɛto no no, na ɔhunuu sɛ Hebrifoɔ no yɛ nnipa a wɔntumi nni wɔn soɔ, ɛfiri sɛ Onyankopɔn Tumfoɔ no ko maa wɔn ntira. Enti ɔsoma kɔɔ wɔn nkyɛn

14 na ɔne wɔn kɔkasaa sɛ wɔmma wɔnsiesie biribiara wɔ abodwoeɛ mu, na ɔhyɛɛ bɔ sɛ, ɔne ɔhene bɛkasa, na wahyɛ no ara ama wabɛyɛ wɔn adamfo.

15 Makabeus repɛ biribiara yie nti, ɔpenee deɛ Lisias kaeɛ no nyinaa so. Ɛfiri sɛ ɔhene de biribiara a Makabeus twerɛ de faa Lisias so srɛ maa Yudafoɔ no maeɛ.

16 Krataa a Lisias twerɛ kɔmaa Yudafoɔ no, na emu nsɛm nie:

17 Lisias twerɛ de kɔma Yudafoɔ man, mekyea mo.

18 Mabɔ ɔhene amanneɛ wɔ biribiara a ɛsɛ sɛ mede kɔ n’anim, na wapene biribiara a ɔyɛ a ɛbɛyɛ yie nyinaa so.

19 Sɛ mobɛma mo adɔeɛ a moyɛ ma aban no atena hɔ deɛ a, ɛnneɛ mɛbɔ mmɔden apere ama mo yiedie daakye.

20 Na ɛfa saa nsɛm yi ne deɛ ɛwɔ mu no nyinaa no, mahyɛ saa nnipa yi ne wɔn a wɔsi me ananmu sɛ wɔne mo nnwenwene ho.

21 Makra mo. Dioskorintius a ɔtɔ so aduonu nnan, afe a ɛtɔ so ɔha aduanan nwɔtwe mu.

22 Ɔhene krataa no ka sɛ:

Ɔhene Antiokus twerɛ de kɔma ne nua Lisias, mekyea wo.

23 Afei a yɛn agya ati nananom abosom yi, yɛmpɛ sɛ ahemman no mu nnipa bɛteetee wɔ wɔn nsɛm ntotoeɛ ho.

24 Yɛate sɛ Yudafoɔ no mpene yɛn agya nsesaeɛ a ɔpɛɛ sɛ ɔsesa wɔn kɔ Helafoɔ amanneɛ mu no so, na mmom wɔpɛ wɔn ara ankasa wɔn amanneɛ kwan a wɔde tena aseɛ, na wɔsrɛ wɔmma wɔn kwan saa.

25 Saa ara nti, ɛsiane sɛ yɛpɛ sɛ ɔman yi nso nya ahotɔ nti, yɛafa adwene sɛ, yɛde wɔn asɔredan no bɛsan ama wɔn na wɔatena sɛdeɛ wɔn nananom amanneɛ teɛ no.

26 Yei nti, ɛbɛyɛ ama wo sɛ wobɛsoma akɔka akyerɛ wɔn na fa ayɔnkofa anohoba ma wɔn, sɛdeɛ ɛbɛyɛ a wɔbɛhu yɛn nhyehyɛɛ na wɔn ani agye, na wɔn akoma atɔ wɔn yam sɛdeɛ wɔn ara bɛbɔ wɔn bra.

27 Nsɛm a krataa a ɔhene de kɔmaa ɔman no seɛ nie:

Ɔhene Antiokus twerɛ de kɔma Yudafoɔ mmarahyɛbadwa ne Yudafoɔ nkaeɛ no, mekyea mo.

28 Sɛ mo ho yɛ a, na deɛ yɛrehwehwɛ ara ne no. Yɛn nso yɛn ho yɛ.

29 Menelaus abɔ yɛn amanneɛ sɛ, mopɛ sɛ mosan kɔ mo nkyi na mokɔbɔ mo ara mo bra.

30 Saa nti wɔn a wɔbɛkɔ fie wɔ Kantikus afe a ɛtɔ so dummiɛnsa mu no, wɔbɛyɛ yɛn ayɔnkofa na akwanma ho bɔhyɛ

31 sɛdeɛ ɛbɛyɛ na Yudafoɔ bɛdi wɔn ara wɔn aduane ne wɔn mmara so, sɛdeɛ na ɛteɛ kane no, na wɔn mu biara nni hɔ a wɔbɛha no wɔ ɔkwan biara so wɔ biribiara a wɔmmoapa fom yɛeɛ no.

32 Na masoma Menelaus nso sɛ ɔmmɛhyɛ mo nkuran.

33 Yɛakra mo. Kantikus a ɔtɔ so dunum, afe a ɛtɔ so ɔha aduanan nwɔtwe.

34 Romafoɔ no nso soma de krataa kɔeɛ a emu nsɛm ka sɛ:

Kuintus Memmius ne Titus Manius a wɔyɛ Romafoɔ abɔfoɔ no twerɛ de kɔma Yudafoɔ man no, yɛkyea mo.

35 Na ɛfa deɛ Lisias a ɔyɛ ɔhene busuani no de ama wo no, yɛn nso yɛfoa so.

36 Nanso ɛfa nsɛm a ɔsii agyinaeɛ no, wɔde bɛkɔ akɔto ɔhene anim, ɛberɛ a wobɛdwene ho awie ara pɛ, tu obi na ɔmmra ntɛm ara sɛdeɛ ɛbɛyɛ na yɛbɛtumi asusu deɛ ɛfata ama wo. Ɛfiri sɛ yɛnam kwan so rekɔ Antiokia.

37 Saa nti yɛ no ntɛm soma abɔfoɔ na wɔmfa w’atemmuo mmrɛ wo.

38 Yɛakra mo. Kantikus a ɔtɔ so dunum, afe a ɛtɔ so ɔha aduanan nwɔtwe.

Nsɛm a ɛsisiiɛ wɔ Yopa ne Yamnia

1 Ɛberɛ a wɔyɛɛ saa nhyehyɛɛ yi wieeɛ no, Lisias san kɔɔ ɔhene hɔ, na Yudafoɔ no kɔ kɔyɛɛ wɔn kua.

2 Nanso amradofoɔ binom a wɔwɔ mmeaeɛ, Timoteo ne Genaeus ba Apolonius, ne Hieronimus ne Demofon, na deɛ ɔka yeinom ho ne Nikanor a ɔyɛ amrado wɔ Kipro no, yɛɛ sɛ wɔmmma Yudafoɔ no ntena ase kommyɛ ne asomdwoeɛ mu.

3 Na nnipa a wɔwɔ Yopa no yɛɛ nnoɔma bi a ɛnyɛ nyamesuro sɛ yei; wɔtoo wɔn nsa frɛɛ Yudafoɔ a na wɔtete wɔn mu no ne wɔn yerenom ne wɔn mma sɛ wɔmmɛtena akodoɔ bi mu a wɔde aba, nneyɛɛ a wɔyɛ kyerɛɛ sɛ wɔnni adwemmɔne biara fa Yudafoɔ no ho;

4 na wɔtoo aba wɔ ɔman no mu de yɛɛ yei. Ɛberɛ a wɔgye tomm no, ɛsiane sɛ wɔpɛ sɛ wɔtena ase asomdwoeɛ mu nti, nnipa a wɔwɔ Yopa no faa wɔn kɔe ɛpo mu, na wɔyiyii wɔn guu ɛpo no mu, nnipa bɛyɛ ahanu.

5 Ɛberɛ a Yuda tee sɛ wɔayɛ nyamebrasɛm a wɔayɛ atia ne kuromfoɔ no,

6 ɔfrɛɛ Onyankopɔn, ɔtemmufoɔ tenenee no, na ɔhyɛɛ ne nkurɔfoɔ no sɛ motua ɔnuanom awudifoɔ no. Anadwo no, ɔtoo ɛhyɛn gyinabea mu gya de hyee akodoɔ no, na ɔkunkumm wɔn a wɔadwane akɔhunta hɔ no.

7 Afei, ɛsiane sɛ na wɔatoto kuro no aponkɛseɛ no mu nti, ɔtwe sanee, na ɔbɔɔ ne tirim pɔ sɛ ɔbɛsane aba bio, na wabɛtɔre Yopa kuro mu no nyinaa ase.

8 Nanso ɔtee sɛ nnipa a wɔwɔ Yamnia nso rehwehwɛ afa saa kwan yi ara so de atɔre Yudafoɔ a wɔn ne wɔn teɛ no ase afiri hɔ no,

9 ɔtuaa Yamniafoɔ anadwo na ɔde ogya too ɛhyɛn gyinabea hɔ ne ahyɛn a ɛwɔ hɔ no mu hyeeɛ, na gya no hrann maa wɔhunuu no wɔ Yerusalem, ɛbɛyɛ kwansini aduasa kwan.

Ɔtu sa wɔ Gilead

10 Ɛberɛ a wɔfiri hɔ kɔɔ wɔn anim bɛboro kwansini baako sɛ wɔrekɔtua Timoteo no, na Arabfoɔ bɛboro mpem nnum a wɔwɔ apɔnkɔsotefoɔ ahanum a wɔtua wɔn.

11 Na wɔkoo ɔko denden wieeɛ no, Onyankopɔn boaa Yuda ne n’ayɔnkofoɔ, na wɔdii nkonim. Na nnipa a wɔntena faako no a wɔadi nkoguo no srɛɛ Yuda sɛ ɔmma wɔn ayɔnkoyɛ anohoba, na wɔhyɛ bɔ sɛ wɔbɛma no anantwie na wɔaboa ne nkurɔfoɔ akwan afoforɔ nyinaa mu.

12 Yuda hunuu sɛ wɔn so bɛba mfasoɔ wɔ akwan ahodoɔ so, enti ɔpenee so sɛ ɔne wɔn bɛtena asomdwoeɛ mu; na ɛberɛ a wɔgyee n’anohoba ahodoɔ wieeɛ no, wɔsan kokɔɔ wɔn ntomadan mu.

13 Ɔsan nso kɔɔ kuro bi a na wɔde sumpi ne afasuo abɔ ho ban dendeenden, na Amanaman mufoɔ ahodoɔ tete mu. Na ne din ne Kaspin.

14 Na wɔn a na wɔwɔ mu no, ɛsiane sɛ na wɔde wɔn ho ato afasuo no ahoɔden ne aduane a wɔnya no nti, wɔtwaa Yuda ne ne mmarima no adapaa, wɔsii wɔn atwetweɛ na wɔkekaa abususɛm ne nsɛm a ɛho nteɛ kyerɛɛ wɔn.

15 Nanso Yuda ne ne dɔm no frɛɛ wiase Hene kɛseɛ no, ɔno a ɔmfa akodeɛ anaasɛ akodeɛ a wɔde bubu afasuo na ɔdwirii Yeriko wɔ Yosua berɛ so, ɔde anibereɛ to hyɛɛ afasuo no so.

16 Ɛyɛɛ Onyankopɔn pɛ maa wɔfaa kuro no, na wɔkunkumm nnipa akra a wɔn dodoɔ nni ano, a mpo ɔtadeɛ bi a ɛbɛn hɔ no, ne tɛtrɛtɛ mu yɛ kwansini baako nkyɛ mu nnan, danee mogya a ɛretene.

Yuda di Timoteo asraafoɔ so nkonim

17 Ɛberɛ a wɔfiri hɔ twaa kwan kwansini aduɔkron nnum no, wɔbɛduruu Karas, na wɔkɔɔ Yudafoɔ bi a wɔfrɛ wɔn Toubiani.

18 Wɔanhunu Timoteo wɔ saa mantam mu hɔ, ɛfiri sɛ, saa berɛ no, na wafiri hɔ kɔ wɔ berɛ ko a wanyɛ biribiara wɔ hɔ, ɛwom sɛ beaeɛ foforɔ bi deɛ na wagya abansifoɔ a wɔyɛ den wɔ hɔ.

19 Dositeus ne Sosipater a wɔyɛ Makabeus asafohene no siim kɔe kɔkunkumm wɔn a Timoteo agya wɔn wɔ abandenden mu hɔ no, na wɔboro mmarima mpem du.

20 Nanso Makabeus hyehyɛɛ n’asraafoɔ no akuakuo, na ɔde mmarima sisii ekuo biara ano, na ɔyɛɛ ntɛm tii Timoteo, a na ɔwɔ asraafoɔ a wɔnam anammɔn mu mpem aduonu ne apɔnkɔsotefoɔ ɔpenu ne ahanum.

21 Ɛberɛ a Timoteo tee sɛ Yuda reba no, ɔsomaa mmaa ne nkwadaa na afei nso nnesoa kɔɔ beaeɛ bi a wɔfrɛ hɔ Karnaim; ɛfiri sɛ, saa beaeɛ hɔ yɛ baabi a ɛyɛ den pa ara sɛ wɔtua, na ɛyɛ den sɛ wɔnya kwan kɔ hɔ, ɛsiane akwan hiahiaa a wɔde kɔ hɔ no.

22 Nanso ɛberɛ a Yuda ne dɔm a ɛdi kan no baeɛ no, ehu ne suro tɔɔ ɔtamfoɔ no so, ɛnam deɛ ɔhu nnoɔma nyinaa no yii no adi kyerɛɛ wɔn no nti. Wɔredwane no wɔde wɔn ti pempemee maa wɔn ankasa wɔpirapiraa wɔn ho, na wɔn nkrantɛ ano wowɔɔ wɔn.

23 Na Yuda kɔɔ so ara tii wɔn dendeenden, na ɔmaa nnebɔneyɛfoɔ no totɔɔ nkrantɛ ano, na ɔkumm nnipa mpem aduasa.

24 Timoteo ankasa kɔtɔɔ Dositeus ne Sosipater ne wɔn mmarima nsam. Ɔtwaa wɔn nkontompo kɛseɛ de srɛɛ wɔn sɛ wɔmma no kwan ma ɔnkɔ, ɛfiri sɛ wakye wɔn mu bebree awofoɔ, ne ebinom nso nuanom, a wɔrennyae wɔn koraa.

25 Na ɛberɛ a ɔkasaa pii de sii ne bɔhyɛ a nokorɛdie wɔ mu so dua no, wɔmaa no kwan kɔe, sɛdeɛ ɛbɛyɛ a wɔbɛgye wɔn nuanom nkwa.

Yuda nkonimdie afoforɔ

26 Afei Yuda siim kɔɔ Karmaim ne Atargatis abosonnan no so, na wɔkumm nnipa mpem aduonu nnum.

27 Ɔtwaa yeinom gui na ɔsɛe wɔn wieeɛ no, ɔsiim kɔɔ Efron so, kuro a wɔabɔ ho ban a Lisias nnipa dɔm a wɔfifiri aman ahodoɔ so teɛ hɔ. Mmeranteɛ agramo gyinagyinaa afasuo no anim na wɔbɔɔ ho ban dendeenden; na akodeɛ a wɔde bu afasuo bebree ne aprɛmoboba pii wɔ hɔ.

28 Nanso Yudafoɔ no frɛɛ Opunpuni a ɔde tumi hwete atamfoɔ ahoɔden, na wɔn nsa kaa kuro no, na wɔkunkumm nnipa bɛyɛ mpem aduonu nnum wɔ wɔn a na wɔaka wɔ mu no.

29 Wɔfirii hɔ no, wɔyɛɛ ntɛm kɔɔ Seketopolis a wofiri Yerusalem rekorɔ bɛyɛ kwansini aduɔson nnum.

30 Nanso ɛberɛ a Yudafoɔ a wɔte hɔ no dii adanseɛ wɔ adwempa a Seketopolisfoɔ wɔ fa wɔn ho, ne mmoa a wɔde ma wɔn wɔ ahohia berɛ mu,

31 wɔdaa wɔn ase, na wɔtuu wɔn fo sɛ wɔne wɔn ntena yie wɔ mmerɛ a ɛbɛba no nso. Afei wɔkɔɔ Yerusalem, ɛberɛ a na adapɛn afahyɛ no rebɛn no.

Yuda di Gorgias

32 Wɔdii Pentekoste afahyɛ wieeɛ no, wɔyɛɛ ntɛm kɔɔ Gorgias a ɔyɛ amrado wɔ Idumea no so,

33 ɔno na ɔde asraafoɔ a wɔnam anammɔn mu mpem mmiɛnsa ne apɔnkɔsotefoɔ ahanan firii adi.

34 Ɛberɛ a wɔde bɔɔ ani no, ɛbaa sɛ Yudafoɔ no mu nnipa kakraa bi totɔeɛ.

35 Nanso onipa bi a wɔfrɛ no Dositeus, a ɔka Bakenor mmarima ho no, a ɔte pɔnkɔ so na ɔyɛ onipa hoɔdenfoɔ no, sɔɔ Gorgias mu, ɔsɔɔ n’atadeɛ mu na ɔretwe no wɔ ahoɔden so, hwehwɛ sɛ ɔbɛkye busuyɛni no animono so. Ɛberɛ no ara mu na Trakian apɔnkɔsotefoɔ no mu baako tu taa no so na ɔtwaa ne nsa; enti Gorgias nyaa kwan dwane kɔduruu Marisa.

36 Ɛnam sɛ na Edris ne ne mmarima no ako mmerɛ tentene mu nti, na wɔabrɛ, na Yuda frɛɛ Awurade sɛ ɔmmra wɔn afa, na ɔmmɛdi wɔn kan wɔ ɔsa mu.

37 Na wɔde wɔn nananom kasa teaam de nnwom bɔɔ ɔko mu ose; afei ɔtuaa Gorgias akofoɔ no wɔ ɛberɛ a na wɔn ani nna kwan, na wɔmaa wɔn dwaneeɛ.

Mpaeɛ a wɔbɔ ma wɔn a wɔawu wɔ ɔko mu

38 Afei Yuda boaboaa n’akofoɔ nyinaa ano na wɔkɔɔ Adulam kuro mu. Na ɛda a ɛtɔ so nson no reba no, wɔtee wɔn ho sɛdeɛ amanneɛ teɛ no, na wɔdii homeda no wɔ hɔ.

39 Adeɛ kyeeɛ no, sɛdeɛ na akɔhia no, Yuda ne ne mmarima no kɔɔ sɛ wɔrekɔsesa wɔn a wɔawuwuo no amu, na wɔde aba abɛtoto wɔn abusuafoɔ nkyɛn wɔ wɔn nananom adamena mu.

40 Na wɔhunuu Yamnia abosom ahoni nketenkete a ɛhyehyɛ awufoɔ no atadeɛ ngusoɔ mu, adeɛ a mmara mma Yudafoɔ ho kwan sɛ wɔnhyɛ. Na ɛbɛdaa adi pefee sɛ, ɛyɛ saa nti na yeinom awuwuo no.

41 Enti wɔn nyinaa hyiraa Awurade, ɔtemmufoɔ tenenee no, wɔ n’akwan ho, ɔno a ɔyi asumaeɛ mu nnoɔma adi no;

42 na wɔdanee wɔn ho yɛɛ odima, na wɔbɔɔ mpaeɛ sɛdeɛ ɛbɛyɛ a bɔne a wɔayɛ no wɔbɛpopa afiri hɔ.

43 Na ɔgyee ntoboa firii onipa biara hɔ, sika a ne dodoɔ yɛ dwetɛbena mpem mmienu, na ɔde soma kɔɔ Yerusalem sɛ wɔmfa nyɛ bɔne afɔdeɛ. Deɛ ɔyɛeɛ yi yɛ adepa, nkanka sɛ ɔdwenee awufosɔreɛ ho no.

44 Na sɛ na ɛnyɛ adeɛ a na ɔrehwɛ kwan sɛ wɔn a wɔawuwuo no bɛsɔre bio deɛ a, ɛnneɛ na ɛyɛ ade hunu ne nkwaseasɛm sɛ wɔbɔ mpaeɛ ma awufoɔ.

45 Na sɛ na ɔrehwɛ akatua fɛfɛ a wɔahyehyɛ sɛ wɔde bɛma wɔn a wɔawuwu wɔ nyamesuro mu no a, na ɛyɛ adwene kronkron ne adwene pa. Saa nti, ɔyɛɛ mpata maa awufoɔ, sɛdeɛ ɛbɛyɛ a wɔbɛgye wɔ nkwa afiri wɔn bɔne mu.

Wɔku Menelaus

1 Afe ɔha ne aduanan mu no, Yuda ne ne mmarima tee sɛ Antiokus Eupator de asraafoɔ dɔm kɛse rebɛtua Yudea,

2 na Lisias a amammuo hyɛ ne nsa no ka ne ho sɛ ne hwɛfoɔ. Wɔn mu biara kura Helafoɔ asraafoɔ a wɔnam anammɔn mu mpem ɔha ne du, ne apɔnkɔsotefoɔ mpem nnum ne ahasa, asono aduonu mmienu, ne nteaseɛnam a wɔde sekan kantankrankyi ahyehyɛ ho ahasa.

3 Menelaus nso kɔkaa wɔn ho, na ɔde nyaatwom hyɛɛ Antiokus sɛ ɔnkɔ so ara nyɛ deɛ ɔreyɛ no, ɛnyɛ ne man yiedie nti, na mmom ɔdwenee sɛ ɛbɛma ne dibea no atim.

4 Nanso ahemfo mu Hene no maa Antiokus bu fui tiaa onipa huhuni no; na ɛberɛ a Lisias ka kyerɛɛ no sɛ, ɛnam saa onipa yi so na ɔhaw no nyinaa aba no, ɔhene hyɛɛ sɛ wɔmfa no nkɔ Boroea na wɔmfa ɛhɔ amammerɛ kwan a wɔfa so kum no nku no.

5 Abantenten bi wɔ hɔ a ne tentene yɛ basafa aduonu nnum, na nso ahyɛ mu ma, na ɛwɔ ano kawa a ɛtwa ho hyia a ɛsiane kɛse kɔ nso no mu.

6 Ɛhɔ na wɔpia obiara a ɔdi fɔ wɔ abususɛm ho anaasɛ ɔnya din pa wɔ bɔne afoforɔ ho no ma ɔkɔ ɔsɛeɛ mu.

7 Saa kwan yi so na Menelaus a ɔyɛ mmaratoni no nam so wui, a mpo wɔansie no wɔ asase so.

8 Na yei yɛ ade tenenee titire; ɛfiri sɛ wayɛ bɔne bebree atia afɔrebukyia a ɛso gya ne nso yɛ kronkron no, ɔhyiaa ne wuo wɔ nso no mu.

Ɔsa a ɛbɛn Modein kuro mu

9 Na ɔhene no de ahantan tantane reba abɛkyerɛ Yudafoɔ no nnoɔma a ɛnyɛ koraa sene deɛ wɔayɛ no dada no wɔ n’agya berɛ so.

10 Nanso ɛberɛ a Yuda tee yei no, ɔhyɛɛ sɛ nkurɔfoɔ no mfrɛ Awurade awia ne anadwo, sɛ ɔmmɛboa wɔn a wɔresi wɔn kwan agye wɔn mmara, wɔn man ne asɔredan kronkron no,

11 na mma ho kwan ma nkurɔfoɔ a wɔafiri aseɛ rekanyan wɔn ho ama yɛatɔ Amanaman abusuyɛfoɔ yi nsam.

12 Ɛberɛ a wɔn nyinaa boom srɛɛ mmɔborɔhunufoɔ Awurade no, wɔde esu, mmuadadie ne da a wɔdedaa fam butubutuu hɔ nnansa a wɔanyae ara da. Yuda tuu wɔn fo na ɔhyɛɛ wɔn sɛ wɔnyɛ krado.

13 Na ɔne mpanimfoɔ no kasa wɔ kokoam wieeɛ no, ɔbɔɔ ne tirim sɛ ɔbɛsim na ɔnam Onyankopɔn mmoa so ɔbɛhu deɛ ɔbɛyɛ, ansa na ɔhene asraafoɔ no ahyɛne Yudea na wɔafa kuro no.

14 Enti ɔde agyinasie no hyɛɛ wiase Bɔfo no nsa, na ɔtuu n’akofoɔ no fo sɛ wɔnko ko den nkɔ wuo mu ma mmara, asɔredan, kuro, ɔman, ne aman no, na ɔkyeree nsra a na ɛbɛn Modein.

15 Ɔde nnyinasoɔ asɛm bi maa n’akofoɔ no sɛ, “Onyankopɔn nkonimdie”, na ɔyiyii mmeranteɛ akokoɔdurufoɔ no mu bi, na ɔne wɔn tuaa ɔhene no tenabea anadwo na ɔkunkumm mmarima bɛyɛ mpem mmienu wɔ nsraban no mu.

16 Awieeɛ no, wɔmaa ehu ne sakasaka baa nsra no mu hɔ, na ɔsanee n’akyi wɔ nkonimdie mu.

17 Yei sii wɔ berɛ a na anim mu reteteɛ no, ɛfiri sɛ wɔnyaa mmoa firii Awurade hɔ.

Antiokus ne Yudafoɔ no yɛ apam

18 Ɔhene no hunuu Yudafoɔ no mmaninsɛm no, ɔfaa ɔkwan bi so sɛ ɔbɛtua wɔn wɔ faako a wɔwowɔ no.

19 Ɔkɔtuaa Bet-sur, Yudafoɔ abandenden no na wɔkaa no gui, ɔtuaa bio, na wɔdii ne so nkonim.

20 Yuda soma kɔmaa abansifoɔ no biribiara a ɛhia.

21 Nanso Rodokus, Yudafoɔ no mu atitire no mu baako kɔkaa nsumaeɛ mu nsɛm kyerɛɛ ɔtamfo no; wɔhwehwɛɛ no kyeree no, na wɔde no kɔtoo afiase.

22 Ɔhene no ne nnipa a wɔwɔ Bet-sur yɛɛ nhyehyɛɛ a ɛtɔ so mmienu, ɔbɔɔ anohoba ahodoɔ, na ɔgyee wɔn deɛ, ɔtwe sanee kɔtuaa Yuda ne ne mmarima, na ɔdii wɔn so nkonim;

23 ɔtee sɛ, Filipo a wɔagya ne hɔ de amammuo ahyɛ ne nsa no ate atua wɔ Antiokia; ne ho dwirii no, ɔfrɛɛ Yudafoɔ no bae, ɔgyae mu na ɔdii nse kyerɛɛ wɔn sɛ ɔbɛyɛ deɛ wɔfata nyinaa ama wɔn, ɔne wɔn siesiee wɔn ntam na wɔbɔɔ afɔdeɛ, ɔdii kronkronbea hɔ no ni, na ɔde akyɛdeɛ baa kronkronbea hɔ.

24 Ɔgyee Makabeus, na ɔdane Hegemonides gyaa sɛ amrado firi Ptolemais kɔpem Gerar,

25 na ɔkɔɔ Ptolemais. Nnipa a wɔwɔ Ptolemais no bo fuu wɔ nhyehyɛɛ a wɔyɛeɛ no; na nokorɛ mu no, wɔn bo fui ara sɛ, na anka ɔpɛ sɛ wɔtu nsɛm a ɛwɔ mu no gu.

26 Lisias faa badwam apa no, na ɔkyerɛkyerɛɛ mu ara yie de danee wɔn adwene, pataa wɔn na ɔnyaa wɔn anisɔ, na ɔsiim kɔɔ Antiokia. Sei na ɔhene atua ne nsaneakyire wieeɛ.

Alkimus kasa tia Yuda

1 Mfeɛ mmiɛnsa akyi no, Yuda ne ne mmarima no tee sɛ, Seleukus ba Demetrius de asraafoɔ a wɔyɛ den ne ahyɛn nam ɛpo so aba suhyɛngyinabea a ɛwɔ Tripolis,

2 na wɔabɛfa ɔman no, na wɔafa Antiokus ne ne hwɛsofoɔ Lisias kɔ.

3 Afei obi a wɔfrɛ no Alkimus a akane no na anka ɔyɛ ɔsɔfo panin nanso ɔfiri ne pɛ mu guu ne ho fi wɔ mpaepaemu berɛ no mu, ɔhunuu sɛ ɔkwan biara nni hɔ a ɔbɛtumi afa so anya banbɔ anaasɛ ɔbɛnya kwan wɔ afɔrebukyia no ho bio.

4 Na ɔkɔɔ Ɔhene Demetrius nkyɛn wɔ bɛyɛ afe ɔha ne aduonum baako no mu,kɔmaa no sika abotire ne mmerɛkɛnson, na deɛ ɛka yeinom ho yɛ amammerɛ ngodua mman a ɛfiri asɔredan mu no bi. Saa da no deɛ, ɔyɛɛ komm.

5 Nanso ɔnyaa kwan a ɔnam so yɛɛ n’abɔdam adeɛ no wɔ berɛ a Demetrius too nsa frɛɛ no wɔ abadwafoɔ no nhyiamu ase. Wɔbisaa no sɛdeɛ Yudafoɔ no nneyɛɛ ne wɔn nsusuiɛ teɛ. Ɔbuaa sɛ:

6 Yudafoɔ a wɔfrɛ wɔn sɛ Hasideafoɔ a wɔn kannifoɔ ne Yuda Makabeus no repere sɛ wɔbɛtu sa, na wɔrepiapia nkurɔfoɔ ama wɔate atua, na wɔremma ahemman no nya amannwoeɛ.

7 Saa nti, mede me nananom animuonyam no ato nkyɛn, mekyerɛ ɔsɔfo panin dibea no, na afei maba ha yi.

8 Deɛ ɛdi kan ne sɛ, deɛ ɔhene pɛ no ne deɛ ɛhia me kɛse, na deɛ ɛtɔ so mmienu ne sɛ, ɛsiane sɛ mewɔ obuo de ma me man mufoɔ. Sɛ nti ne sɛ, ɛnam wɔn mabobɔ wɔn din yi nkwaseasɛm so na ama seesei ara yɛn man akɔgyina mmusuo kɛseɛ mu yi.

9 O ɔhene, ɛsiane sɛ wo ara wonim deɛ ɛwɔ nsɛm yi mu nyinaa nti, ma no nsɔ w’ani sɛ, wobɛfa yɛn man yi ne nnipa a wɔredi amia yi ho adwene, sɛdeɛ w’adom ayamyie a wokyerɛ no wɔ nnipa nyinaa so no teɛ.

10 Na sɛ Yuda yi da so ara te ase yi, ɛbɛyɛ den sɛ aban no bɛnya asomdwoeɛ.

11 Na ɛberɛ a ɔkaa yei no, ɔhene Nnamfonom nkaeɛ no tanee Yuda, na ntɛm ara wɔhuruu Demetrius bo kɛse.

12 Ntɛm ara na ɔyii Nikanor a na ɔhwɛ asono no soɔ no, na ɔyɛɛ no amrado wɔ Yudea so, na ɔsomaa no

13 de ahyɛdeɛ yi maa no sɛ ɔnkɔkum Yuda na ɔmmɔ n’akofoɔ no nhwete, na ɔmfa Alkimus nsi hɔ sɛ ɔsɔfo panin wɔ asɔredan kɛseɛ no mu.

14 Na amanaman mufoɔ a wɔwɔ Yudea no a anka wɔadwane Yuda anim da no baeɛ bɛkaa Nikanor ho, na wɔredwene sɛ, mmusuo ne atoyerɛnkyɛm a ɛbɛba Yudafoɔ no soɔ yɛ deɛ ɛde yiedie bɛbrɛ wɔn.

Nikanor yɛ Yuda n’adamfo

15 Ɛberɛ a Yudafoɔ no tee sɛ Nikanor reba no na amanaman mufoɔ no reboaboa wɔn ano no, wɔde dɔteɛ guu wɔn tirim na wɔbɔɔ ne mpaeɛ sɛ ɔmfa ne nkurɔfoɔ ntim hɔ daa, na da biara ɔnyi ne ho adi mfa nkora ɔno ara n’agyapadeɛ.

16 Na deɛ wɔn kannifoɔ no hyɛeɛ no, wɔsii mu firii hɔ ne wɔn de kɔbɔɔ ani wɔ akuraa bi a wɔfrɛ hɔ Desau.

17 Na Simon a ɔyɛ Yuda nua no ne Nikanor akɔhyiam wɔ akono ama wɔapem wɔn kɔ akyire kakraa bi, ɛfiri sɛ na ɔtamfo no abɔ wɔn hu mpofirim.

18 Nanso ɛberɛ a Nikanor tee Yuda mmaninneɛ ne n’akofoɔ no wɔn akokoɔduro wɔ ɔsa a wɔtu ma wɔn man no, ɔtwe sanee sɛ ɔde mogyahwieguo na ɛbɛkyerɛ asɛm no bɔberɛ.

19 Saa nti ɔsomaa Posidonius, Teodotus ne Matatias sɛ wɔnkɔma na wɔnnye anohoba ne ayɔnkofa.

20 Na ɛberɛ a wɔkekaa nhyehyɛɛ no nyinaa wieeɛ no, na ɔkannifoɔ no ka kyerɛɛ ne nkurɔfoɔ no, ɛbaa sɛ wɔnyaa adwene koro, na wɔpenee apam no so.

21 Akannifoɔ no hyɛɛ ɛda bi a wɔn ara ankasa bɛhyiam. Teaseɛnam baako baako firii asraafoɔ afanu no hɔ baeɛ; na wɔde mpanimfoɔ adwa sisii mu.

22 Na Yuda de akofoɔ a wɔamia gyinagyinaa mmeaeɛ a ɛho hia sɛdeɛ ɛbɛyɛ na wɔasi ɔtamfo no nkontompo a ɔbɛtwa no mpofirim nkontompo; enti wɔkasae.

23 Nikanor tenaa Yerusalem na wanyɛ biribiara a ɛmfata, na mmom ɔpamoo nnipa a na wɔatwa ahyia no.

24 Na ɔmaa Yuda tenaa n’anim daa; na n’ani ka onipa no ho.

25 Ɔtuu ne fo sɛ ɔnware na ɔnwo mma; ɛno nti Yuda waree na ɔtenaa ase bɔɔ bra sɛdeɛ wɔyɛ no.

Nikanor dane tia Yuda

26 Nanso ɛberɛ a Alkimus hunuu adwempa a wɔwɔ wɔ ma wɔn ho no, ɔfaa apam a na wɔayɛ no de kɔɔ Demetrius nkyɛn. Ɔbɔɔ ne amanneɛ sɛ, Nikanor nni nokorɛ mma aban no, ɛsiane sɛ wayi Yuda a ɔyɛ ɔmammɔni no sɛ n’adedifoɔ, na atia ahemman no.

27 Ɔhene akoma sɔree, na ne bo fui wɔ saa onipa huhuni no, ne ntwatosoɔ no, na ɔtwerɛ kɔmaa Nikanor, kyerɛɛ sɛ n’ani nnye apam a wayɛ no ho, enti ma ɔnkyɛre ho koraa, na mmom ɔnsoma ma wɔmfa Makabeus mmra Antiokia sɛ ɔdeduani.

28 Ɛberɛ Nikanor nsa kaa nkra yi no, ɛhaa no yie na ne werɛ hoe sɛ ɛsɛ sɛ ɔtwa wɔn nhyehyɛɛ no mu wɔ berɛ a onipa no nyɛɛ bɔne biara.

29 Na ɛsiane sɛ ɔntumi nsɔre ntia ɔhene no nti, ɔhwehwɛɛ ɛberɛ pa bi a ɔbɛtumi adi dwuma yi wɔ aniteɛ mu.

30 Nanso Makabeus, hunuu sɛ Nikanor ayɛ katee wɔ ɔno ne Makabeus nkitahodie mu, na ɔne no nkasa wɔ anidie kwan so sɛdeɛ na ɔteɛ kane no, enti ɔbuae sɛ, saa kateeyɛ yi mfiri adwempa mu. Enti ɔboaboaa ne nkurɔfoɔ dodoɔ no ara ano a na wɔdɔɔ so, na wɔdwane firii Nikanor anim kɔsumaeɛ.

31 Na Nikanor hunuu sɛ Makabeus nam nyansa kwan so abu no kwasea no, ɔkɔɔ asɔredan kronkron no mu, ɛberɛ a na asɔfoɔ no rebɔ amammerɛ afɔdeɛ no, ɔhyɛɛ wɔn sɛ wɔnyi onipa no mma no.

32 Ɛberɛ a wɔdii nse sɛ wɔnnim onipa a wɔrehwehwɛ no no,

33 ɔtenee ne nsa nifa kyerɛɛ kronkronbea hɔ dii nse sɛ: Sɛ woanyi Yuda amma me sɛ deduani a, mɛdwiri Onyankopɔn dan gu fam, na mabubu afɔrebukyia no, na masi abosonnan a ɛyɛ fɛ de ama Dionisus.

34 Ɔkaa yei wieeɛ no, ɔfiri hɔ kɔe. Afei asɔfoɔ no tenee wɔn nsa kyerɛɛ ɔsoro na wɔfrɛɛ wɔn man no Kamafoɔ a ɔte hɔ daa no wɔ nsɛm yi mu sɛ:

35 O, nnipa nyinaa Awurade, ɛwom sɛ wonhia biribiara deɛ, nanso ɛsɔɔ w’ani sɛ wɔnsi asɔredan mma wo tenabea wɔ yɛn mu;

36 enti afei, O Ɔkronkronni, kronkron nyinaa mu Awurade, bɔ saa fie yi a nansa yi ara wɔadwira ho no ban firi figuo ho daa.

Rasis wu ma ne man

37 Onipa bi a na wɔfrɛ no Rasis, Yerusalem mpanimfoɔ no mu baako kasa tiaa Nikanor sɛ ɔyɛ onipa a ɔdɔ ne man mufoɔ na wɔka ne ho asɛm papa, na din pa a ɛno nti wɔfrɛ no Yudafoɔ agya.

38 Ɛberɛ bi a atwam no, ɛberɛ a na wɔamfa wɔn ho mfra amanaman mufoɔ, na wɔabɔ no soboɔ sɛ ɔyɛ Yudasom mu ni, na ɔde ne nkwa too hɔ wɔ ne mmɔdemmɔ wɔ Yudasom ho.

39 Nikanor pɛɛ sɛ ɔbɛda ɔtane a ɔwɔ ma Yudafoɔ no adi no, ɔsoma maa wɔde asraafoɔ bɛboro ahanum kɔɔ sɛ wɔnkɔkye no;

40 ɛfiri sɛ ɔdwenee sɛ, sɛ wɔkye no ara, na wayɛ wɔn ade kɛse.

41 Ɛberɛ a na akofoɔ no rebɛgye abantenten no afa no, na wɔrepia adihɔ pono no, wɔhyɛɛ sɛ wɔmfa ogya mmra na wɔnhye ɛpono no. Ɛberɛ a na wɔretwa ne ho hyia no, Rasis butuu ne nkrantɛ so,

42 na na ɔpɛ sɛ ɔbɛwu wɔ animuonyam mu sene sɛ ɔbɛtɔ wɔ abɔnefoɔ nsam, na wabrɛ mmusubɔ a ɛmfata n’animuonyam awoɔ no.

43 Nanso ɔko no mu yɛɛ bagyabagya no nti, wantumi ammɔ so pɛpɛɛpɛ, na afei ɛdɔm no retwi fa ɛpono no mu. Ɔde aboɔduro tuu mmirika wɔ fasuo no so, na ɔde akokoɔduro too ne ho kɔhwee nnipa no so.

44 Na wɔtwe pinii wɔn akyi ntɛm ara, na ɔkwan bɛdaa hɔ maa ɔhwee mfimfini wɔ petee mu.

45 Na ahome da so wɔ ne mu no, ɔsɔree mpo berɛ a mogya retu no na n’apirakuro ayɛ kɛseɛ no, ɔtuu mmirika faa ɛdɔm no mu; na ɔkɔgyinaa botan kuronkuron bi so.

46 Na mogya a ɛwɔ ne mu nyinaa asa no, ɔtuu ne nsono de guu ne nsa mmienu mu na ɔto guu nkurɔfoɔ no so, na ɔfrɛɛ nkwa ne honhom Awurade no sɛ ɔnsane mfa mma no bio. Sɛdeɛ ne wuo si yɛeɛ nie.

Nikanor ahantan

1 Ɛberɛ a Nikanor tee sɛ Yuda ne n’akofoɔ wɔ Samaria mantam mu no, ɔyɛɛ nhyehyɛɛ sɛ ɔbɛtua wɔn na wafa ne ho sɔnn wɔ ahomegyeɛ da mu.

2 Na ɛberɛ a Yudafoɔ a wɔhyɛɛ wɔn maa wɔdii n’akyi no, wɔkaa sɛ: Mfa atirimuɔden nkum wɔn, na mmom fa anidie ma deɛ ɔhunu ade nyinaa no, ne da a wadi no ni na wate ho asene nna nyinaa no.

3 Ɔkwaseampanin a wɔadome no mprɛnsa no bisaa sɛ ɔhene bi wɔ ɔsoro a wahyɛ sɛ wɔnni homeda.

4 Na ɛberɛ a wɔkaa sɛ: Ɛyɛ Awurade ankasa, ɔsoro Hene no, ɔno na wahyɛ yɛn sɛ yɛnni ɛda a ɛtɔ so nson no.

5 Ɔbuaa sɛ: Me nso meyɛ ɔhene wɔ asase so, na mehyɛ wo sɛ sɔre na mia, na kɔyɛ adwuma a ɔhene ahyɛ wo no. Nanso, n’adwemmɔne no anyɛ yie.

Yuda siesie Yudafoɔ ho de kɔ ɔko

6 Na saa Nikanor yi wɔ n’ahohoahoa ne n’ahantan mu, ɔbɔɔ ne tirim sɛ ɔbɛsi nkaeɛ dum wɔ nkonimdie a ɔdiiɛ wɔ Yuda ne n’akofoɔ no so asi abɔntene.

7 Nanso Makabeus amma ne gyidie sɛ ɔbɛnya mmoa afiri Awurade hɔ no ampa.

8 Ɔhyɛɛ n’akofoɔ no nkuran sɛ ma wɔnsuro Amanaman no atua no, na mmom wɔmfa nhyɛ wɔn adwenem ɛberɛ a abɛsene kɔ no, mmoa a ɛfiri ɔsoro baa wɔn nkyɛn no, enti wɔnhwɛ nkonim a Otumfoɔ no de bɛmma wɔn no anim kwan.

9 Wɔnam mmara ne adiyifoɔ no nsɛm so hyɛɛ wɔn nkuran, na ɔkaee wɔn wɔ akodie a wɔadi nkonim wɔ mu, na ɔmaa wɔn yɛɛ den kɛseɛ pa ara.

10 Na ɛberɛ a ɔkanyanee wɔn akokoɔduro wieeɛ no, ɔkaa deɛ wɔnyɛ, na ɛberɛ korɔ no ara nso ɔkyerɛɛ wɔn Amanaman no nkontompo ne di a wɔnni wɔn ntam so.

11 Ɔmaa wɔn mu biara miaeɛ a ɛnyɛ ɛkyɛm ne pea mu ahotosoɔ, na mmom akokoɔduro nsɛm a ɛkanyan, na ɔkaa daeɛso bi a ayɛ sɛ anisoadehunu a ɔde totoo ho maa wɔn ani gyeeɛ, na ɛyɛ adeɛ a wɔtumi gye die.

12 Deɛ ɔhunuiɛ nie: Onia a wayɛ ɔsɔfo panin pɛn no, onimuonyamfoɔ ne onipa pa, ahobrɛaseɛni na ɔnyɛ basabasa, obi a ɔkasa nyansam na ɔfiri ne mmɔfraase anya nteteeɛ wɔ biribiara a ɛyɛ papa ho no, na watrɛ ne nsam rebɔ mpaeɛ ama Yudafoɔ man no nyinaa.

13 Saa ɛberɛ no ara mu nso na ɔbarima bi puee hɔ a ɔda nso wɔ ne dwono mu na n’anim yɛ nyam, n’ahennie tumi yɛ nwanwa.

14 Na Onias kasae sɛ: Oyi yɛ onipa a ɔdɔ Israel abusua na ɔbɔ mpaeɛ ma ɔman ne kuro kronkron no, Yeremia a ɔyɛ Onyankopɔn diyifoɔ no.

15 Na Yeremia tenee ne nsa nifa na ɔde sika afena maa Yuda, na ɔkaa asɛm yi kyerɛɛ no sɛ:

16 Gye saa sika afena yi, akyɛdeɛ a ɛfiri Onyankopɔn nkyɛn, na ɛno na wode bɛtwitwa w’atamfoɔ agu.

17 Nsɛm a ɔte firii Yuda hɔ no hyɛɛ no nkuran, na ɛyɛ nsɛm a emu yɛ duru na ɛyɛ nam sɛ ɛkanyan mmarimaa ahoɔden na ɛnyane wɔn akokoɔduro. Wɔbɔɔ wɔn tirim sɛ wɔnkɔ so ara ntena ase nsraban no mu, na mmom wɔde wɔn nsa bɛko akokoɔduro so na wɔde akyerɛ deɛ ɛsɛ sɛ ɛsie, ɛfiri sɛ, kronkronbea no ne asɔredan no gyina ɔsɛeɛ kwan so.

18 Deɛ na ɛhia wɔn no no yɛ wɔn yerenom ne wɔn mma, wɔn nuammarima ne nuammaa nom, ne wɔn abusuafoɔ fam deɛ, adeɛ a na ɛhia wɔn ne kronkronbea hɔ ahoteɛ.

19 Na wɔn a na ɛsɛ sɛ wɔka kuro no mu no, ɛhaa wɔn kɛse wɔ deɛ na ɛrekɔ so wɔ asase petee no mu.

Nikanor nkoguo ne ne wuo

20 Na ɛberɛ a na wɔn nyinaa rehwɛ sɛdeɛ nnoɔma bɛwie no, na ɔtamfo no abɛn dada a wɔn asraafoɔ aboa wɔn ho sɛ wɔrebɛko. Wɔde asono agyinagyina baabi a ɛho hia, na apɔnkɔsotefoɔ gyinagyina wɔn afa ne afa,

21 na Makabeus rehwɛ ɛdɔm a ɛwɔ n’anim, wɔn akodeɛ ahodoɔ ne asono no ho hu no, ɔtenee ne nsa hwɛɛ soro na ɔfrɛɛ Awurade a ɔyɛ anwanwadeɛ no; ɛfiri sɛ na ɔnim sɛ ɛnyɛ akodeɛ, na mmom Awurade na ɔde nkonimdie ma wɔn a ɛfata wɔn.

22 Ɔde saa nsɛm yi frɛɛ no kaa sɛ: O Awurade, wosomaa wo bɔfoɔ wɔ Ɔhene Hesekia a ɔwɔ Yuda berɛ so, na ɔkumm nnipa mpem ɔha aduowɔtwe nnum wɔ Senakerib nsraban mu.

23 Enti afei, O ɔsoro mu Hene, soma ɔbɔfo pa ma no mfa ehu ne ahopopoɔ mmɛdi yɛn anim.

24 Ma wo nsa so wɔ abusuyɛfoɔ yi a wɔsɔre tia wo man kronkron no, na twa wɔn gu fam. Na nsɛm sɛɛ na ɔde wiee ne mpaebɔ no.

25 Nikanor ne n’akofoɔ no de totorobɛnto ne momome tu tenee,

26 nanso Yuda ne n’akofoɔ de Onyankopɔn din bɔ ne mpaeɛ na ɛhyiaa ɔtamfo no.

27 Enti, wɔde wɔn nsa reko no, na wɔde wɔn akoma rebɔ Onyankopɔn mpaeɛ, na wɔkunkumm nnipa bɛyɛ mpem aduasa nnum, na wɔn ani gyee kɛse wɔ deɛ Onyankopɔn ayɛ no ho.

28 Ɛberɛ a ɔko no baa awieeɛ no na wɔde ahurisie resan wɔn akyi no, wɔhunuu Nikanor a wamia a wawu da hɔ.

29 Na ɔsebɔ ne gyegyeegye baa hɔ, na wɔde wɔn nananom kasa hyiraa Ɔhene Awurade no.

30 Afei, Yuda a daa ɔde ne nipadua ne ne kra twitwa gye ne nkurɔfoɔ, onipa a ɔkuraa ne mmeranteberɛ mu adwempa a ɔwɔ ma ne manfoɔ no, ɔhyɛɛ sɛ wɔntwa Nikanor ti ne n’abasa na wɔmfa nkɔ Yerusalem.

31 Na ɛberɛ a ɔduruu hɔ na ɔfrɛɛ ne man mufoɔ boaa wɔn ano, na ɔde asɔfoɔ no gyinaa afɔrebukyia no anim, na ɔsomaa sɛ wɔnkɔfrɛ nnipa a wɔwɔ kuro no mu mmra.

32 Na ɔde onipa debɔneyɛni Nikanor ti ne onipa nsa a ɛho agu fi, a ɔtene de kyerɛɛ Otumfoɔ no fie kronkron no soɔ no kyerɛɛ wɔn.

33 Ɔtwaa Nikanor a ɔnni nyamesuro no tɛkyerɛma, na ɔkaa sɛ ɔde bɛyɛ aduane ama nnomaa na ɔde akyɛdeɛ yeinom a ɛyɛ ne nkwaseadeɛ no asɛn kronkronbea no ntentensoɔ.

34 Na wɔn nyinaa rehwɛ ɔsoro no, wɔhyiraa Awurade a wayi ne ho adi no, kaa sɛ: Nhyira nka deɛ wakora n’ankasa ne beaeɛ amma wɔangu ho fi no!

35 Na Yuda de Nikanor ti no sɛnee abandenden no ho, petee mu a ɛyɛ adansedie ma obiara a ɔrehwehwɛ mmoa afiri Awurade hɔ.

36 Na wɔn nyinaa nam abatoɔ so hyɛɛ mmara sɛ, wɔremma ɛda yi ntwa mu wɔ berɛ ko a wɔnni, na mmom wɔbɛkae bosome a ɛto so dummienu no ne da a ɛtɔ so dummiɛnsa, a ɛyɛ bosome Adar wɔ Aramaik kasa mu, ɛda a ɛdi Mordekai ɛda no anim no.

37 Yei ne sɛdeɛ nnoɔma si kɔ maa Nikanor, na ɛfiri saa berɛ no kuro no abɛdi Hebrifoɔ nsam. Saa nti mede m’asɛm no bɛba awieeɛ.

Ɔtwerɛfoɔ no nsɛm a ɔde wie

38 Na sɛ wɔka no yie na wɔka no sɛdeɛ asɛm no teɛ a, yei ne sɛdeɛ me ara mepɛ no; nanso sɛ wɔanyɛ no yie anaasɛ wɔka no sɛdeɛ ɛnni mu a, ɛnneɛ na sɛdeɛ mɛtumi ayɛ ara ne no.

39 Na sɛdeɛ ɛnyɛ sɛ wɔnom nsa nko ara no, anaasɛ, bio, sɛ wɔbɛnom nsuo nko ara, wɔ ɛberɛ a nsa a wɔde nsuo afra no ayɛ dɛ na ayɛ ahomka, na ɛma onipa ani gye, na saa ara ɔkwan a wɔfa so twerɛ asɛm no ma wɔn a wɔtie no anigyeɛ. Na ɛha na mede bɛsie.