Author: admin

Tenenee ho afotuo

1 Monnɔ tenenee, mo asase so atumfoɔ,

momfa papayɛ nnwene Awurade ho,

na momfa nokorɛdie akoma nhwehwɛ no;

2 ɛfiri sɛ wɔn a wɔnsɔ no nhwɛ no na wɔhu no,

na ɔda ne ho adi kyerɛ wɔn a wɔwɔ ne mu awerɛhyɛmu.

3 Na bɔne adwene tete nnipa ne Onyankopɔn ntam,

na sɛ wɔsɔ ne tumi hwɛ a, ɛma ɔkwasea ho da hɔ;

4 ɛfiri sɛ nyansa renhyɛne ɔkra daadaafoɔ mu,

anaa ɔrentena nipadua a ɛyɛ bɔne akoa mu.

5 Na kronkron ne ahohyɛsoɔ honhom bɛdwane afiri nnaadaa ho,

na agya nkwaseadwene wɔ akyiri,

na n’ani awu wɔ deɛ ɛntene ho.

6 Nyansa yɛ ayamyɛ honhom,

nanso ɛremma abususɛnkafoɔ nkwati wɔn nsɛm ho afodie;

ɛfiri sɛ Onyankopɔn yɛ ɔdanseni wɔ atenka a ɛwɔ wɔn mu ho,

ne deɛ ɔhunu wɔn akoma mu nokorɛ mu, na ɔte deɛ wɔn tɛkyerɛma ka.

7 Ɛfiri sɛ Awurade honhom ahyɛ wiase ma,

na deɛ ɔka nnoɔma nyinaa bɔ mu no nim nsɛm a wɔaka,

8 enti wɔn a wɔka nsɛm a ɛntene no mfa wɔn ho nni,

na ɛberɛ a atɛntenenee bɛtwe aso no, ɛrentwa no nnya.

9 Ɛfiri sɛ wɔbɛyɛ nhwehwɛmu wɔ onipa bɔne afotuo mu,

na ne nsɛm ho amanneɛ bɛba Awurade anim,

na wabu wɔn fɔ wɔ wɔn mmaratoɔ ho;

10 ɛfiri sɛ Onyankopɔn ninkunu aso mpɛ ate nsɛm nyinaa,

na anwiinwii dede ntwa mu a ɔnteɛ.

11 Hwɛ yie wɔ anwiinwii hunu ho,

na kora wo tɛkyerɛma wɔ atorosɛm ho;

ɛfiri sɛ kokoa mu asɛm biara nni hɔ a ɛnni nsunsuansoɔ,

na nnaadaa ano sɛe ɔkra.

12 Mfa w’abrabɔ mu mfomsoɔ no mfrɛfrɛ owuo,

anaa mfa wo nsa ano nnwuma so mfa ɔsɛeɛ mma;

13 ɛfiri sɛ Onyankopɔn ammɔ owuo amma yɛn,

na n’ani nnye ɔteasefoɔ wuo ho.

14 Ɛfiri sɛ ɔno na ɔbɔɔ nnoɔma nyinaa sɛ ɛbɛtena hɔ;

na ahoɔden a wɔde wo mma wɔ wiase no di mu,

na awuduro a ɛsɛe adeɛ biara nni wɔn mu,

na Asamando tumi nni asase so.

15 Ɛfiri sɛ tenenee yɛ adeɛ a ɛnwu da.

Sɛdeɛ abusufoɔ te abrabɔ ase

16 Nanso abusufoɔ nam wɔn nsɛm ne wɔn nnwuma so frɛfrɛ owuo;

wɔfaa no sɛ yɔnkoɔ no, wɔtwaa mu kɔeɛ

na wɔne no yɛɛ apam,

ɛfiri sɛ wɔfata sɛ wɔne no bɔ fekuo.

1 Na wɔtoatoaa adwene a nteaseɛ nni mu keka kyerɛɛ wɔn ho sɛ,

Yɛn nkwa nna yɛ tia, na ɛyɛ awerɛho,

na ano aduro biara nni hɔ berɛ a nkwa aba awieeɛ,

na obiara nni hɔ a wɔnim no sɛ wasane afiri Asamando aba.

2 Ɛfiri sɛ yɛbɛtɔɔ mu ara kwa na wɔwoo yɛn,

na daakye yɛbɛyɛ sɛdeɛ yɛntenaa aseɛ mpo da,

ɛsiane sɛ home a ɛfiri yɛn hwene mu te sɛ wisie,

na yɛn nsusuiɛ te sɛ gyasramma a akoma ɛrebɔ paripari no toto;

3 ɛberɛ a wɔdum no no, nipadua bɛdane nso,

na sunsum no bɛyera sɛ mframa hunu.

4 Ɛrenkyɛre biara na yɛn din ayera,

na obiara renkae yɛn nnwuma;

yɛn nkwa nna bɛsene ayera sɛ mununkum akyi kwan,

na wɔahwete sɛ kusukuukuu a

owia nsensaneɛ taataa no

na ne hyeɛ adi no soɔ.

5 Ɛfiri sɛ yɛn nkwa nna retwa mu te sɛ sunsum,

na yɛntumi nsane yɛn akyi mfiri yɛn wuo mu

ɛfiri sɛ wɔasɔ ano na obiara nsane n’akyi.

6 Saa nti bra ma yɛmfa nnoɔma pa a ɛwɔ hɔ no nnye yɛn ani,

na yɛmfa abɔdeɛ nyɛ adwuma kɛseɛ pa ara sɛ mmeranteɛ berɛ mu.

7 Momma yɛmfa nsa ne nnuhwam a ne boɔ yɛ den nye yɛn ani,

na mma nhwiren a ɛba odua berɛ no nsiane yɛn ho.

8 Ma yɛmfa nhwiren fɛfɛ nhyehyɛ yɛn ho ansa na awu.

9 Mma yɛn mu biara nnyi ne ho mfiri yɛn anigyeɛ mu;

momma yɛn ahosɛpɛ no ho nsɛnkyerɛnneɛ nnuru baabiara,

ɛfiri sɛ yei ne yɛn kyɛfa, na yei ne deɛ wɔde ama yɛn.

10 Momma yɛnhyɛ ɔteneneeni hiani so,

mommma yɛmmfa okunani ho nkyɛ no

anaa yɛmmu ɔpanin tiri mu dwono hwee.

11 Na mmom momma yɛn ahoɔden nyɛ yɛn tenenee mmara,

ɛfiri sɛ deɛ ɛyɛ mmerɛ no akyerɛ sɛ ne ho nni mfasoɔ.

12 Momma yɛnna hɔ ntɛ onipa tenenee,

ɛfiri sɛ ɔha yɛn na ɔtia yɛn nneyɛɛ;

ɔtwii yɛn anim wɔ mmarato ho,

na ɔbɔɔ yɛn soboɔ wɔ bɔne a ɛtia yɛn nteteeɛ ho.

13 Ɔka sɛ ɔwɔ Onyankopɔn ho nimdeɛ,

na ɔfrɛ ne ho Awurade abɔfra.

14 Ɔbɛyɛɛ animkafoɔ maa yɛn wɔ yɛn adwene ho;

15 n’anim ara kwa no yɛ adesoa ma yɛn,

ɛfiri sɛ n’abrabɔ nte sɛ ebinom deɛ,

na n’akwan yɛ nwanwa.

16 Ɔbu yɛn sɛ yɛyɛ ade hunu bi,

na ɔyi yɛn akwan sɛ ɛho nte;

ɔfrɛ ɔteneneeni awieeɛ sɛ anigyeɛ,

na ɔde tu ne ho sɛ Onyankopɔn yɛ n’agya.

17 Momma yɛnhwɛ sɛ ne nsɛm yɛ nokorɛ a,

na momma yɛnsɔ deɛ ɛbɛsi wɔ n’abrabɔ awieeɛ no nhwɛ;

18 ɛfiri sɛ, ɔteneneeni yɛ Onyankopɔn ba ampa ara a, Onyankopɔn bɛgyina n’afa,

na ɔbɛgye no afiri n’atamfoɔ nsa mu.

19 Momma yɛmfa nsopa ne aninyadeɛ nsɔ no nhwɛ,

ama yɛatumi ahu sɛdeɛ ɔsi dwoɔ,

na yɛasɔ n’ahohyɛsoɔ ahwɛ.

20 Momma yɛmmu no fɔ mma animguaseɛ wuo,

na sɛdeɛ ɔka no, wɔbɛbɔ ne ho ban.

Amumuyɛfoɔ mfomsoɔ

21 Saa na wɔdweneeɛ, nanso wɔfomee,

ɛfiri sɛ wɔn amumuyɛ firaa wɔn ani,

22 na wɔanhunu Onyankopɔn ahuntasɛm botaeɛ,

nso wɔn ani anna sɛ kronkronyɛ mu wɔ akatua,

nso wɔanwene anhunu akyɛdeɛ a ɛwɔ hɔ ma akra a wɔnni fɔ;

23 ɛfiri sɛ Onyankopɔn ammɔ onipa amma porɔeɛ,

na ɔyɛɛ yɛn wɔ n’ankasa ne mmerɛ santen su no mu,

24 na mmom ɛnam ɔbonsam n’anibereɛ so na owuo baa wiase mu,

na wɔn a wɔka ne fekuo ho no na ɔnya.

Ateneneefoɔ Nkrabea

1 Nanso ateneneefoɔ kra wɔ Onyankopɔn nsa mu,

na ahohiahia biara renka wɔn da biara da.

2 Nkwaseafoɔ ani so deɛ, asɛ deɛ wɔawuwuo,

na wɔsusuu sɛ wɔn ha firi no yɛ adebɔne,

3 ne firi a wɔfiri yɛn mu akɔ no yɛ ɔsɛeɛ,

nanso wɔwɔ asomdwoeɛ mu.

4 Na ɛwom sɛ nnipa ani so wɔtea wɔn deɛ, nanso

wɔn anidasoɔ yɛ nkwa a ɛnni awieeɛ.

5 Wɔatea wɔn kakra yi, wɔbɛnya yiedie kɛseɛ,

ɛfiri sɛ Onyankopɔn sɔɔ wɔn hwɛeɛ na ɔhunuu sɛ wɔfata no;

6 ɔsɔɔ wɔn hwɛɛ sɛ sika a ɛgu ogya fononoo mu,

na ɔgyee wɔn sɛ ɔhyeɛ afɔdeɛ.

7 Wɔn nsra berɛ mu wɔbɛhyerɛn,

na wɔbɛtu mmirika sɛ ogyasramma a ɛfa ayuo twakaeɛ mu.

8 Wɔbɛdi aman so na wɔadi tumi wɔ nkurɔfoɔ so,

na Awurade bɛdi wɔn so afebɔɔ.

9 Wɔn a wɔn werɛ hyɛ ne mu no bɛte nokorɛ ase,

na ɔnokwafoɔ ne no bɛtena ɔdɔ mu,

ɛfiri sɛ adom ne mmɔborɔhunu wɔ hɔ ma n’ahotefoɔ,

na ɔwɛn wɔn a wayi wɔn no.

Abusufoɔ nkrabea

10 Nanso abusufoɔ deɛ wɔbɛtea wɔn sɛdeɛ ɛfata wɔn adwene nsusuiɛ,

wɔn a wɔbu ateneneefoɔ animtia

na wɔte Awurade so atua no;

11 ɛfiri sɛ wɔn a wɔpo nyansa ne nkyerɛkyerɛ no yɛ mmɔbɔ.

Wɔn anidasoɔ yɛ hunu, na wɔn brɛ so nni mfasoɔ biara,

na wɔn nnwuma yɛ kwa.

Deɛ ɛfa obonini ho

12 Wɔn yerenom yɛ nkwasea, na wɔn mma yɛ bɔne;

13 wɔadome wɔn asefoɔ.

Na nhyira ne obonini a wɔnguu ne ho fi,

na ɔmfaa ne ho nhyɛɛ bɔne fekuo mu;

ɔbɛnya ba berɛ a Onyankopɔn bɛhwehwɛ akra mu no.

14 Nhyira nso ne deɛ wɔasa no a ne nsa nyɛɛ mmarato adeɛ biara,

na ɔnhyehyɛɛ nnoɔma bɔne ntiaa Awurade;

na animteɛ na wɔbɛyi akyerɛ no ɛsiane ne nokorɛdie nti,

ne anigyebea a ɛkorɔn wɔ Awurade asɔrefie.

15 Ɛfiri sɛ wagye din wɔ ne nnwuma pa so aba nti,

na nteaseɛ nhini yɛ adeɛ a ɛntutu.

16 Na awaresɛefoɔ mma rennyini,

na mmaratofoɔ fekuo asefoɔ bɛyera.

17 Mpo sɛ wɔtena ase kyɛre a, wɔremmu wɔn ho akonta,

na akyire koraa no wɔn mpaninyɛ bɛyɛ deɛ animuonyam nni mu.

18 Na sɛ wɔwu ntɛm nso a, wɔrennya anidasoɔ biara

ne awerɛkyekyerɛ wɔ atemmuo da no mu.

19 Ɛfiri sɛ abɔnefoɔ awoɔ ntoatoasoɔ awieeɛ yɛ awerɛhoɔ.

1 Yei deɛ, fanyinam sɛ wonni ba na wowɔ ɔbra pa,

na ɔbra pa ho nkaeɛ yɛ afebɔɔ,

ɛfiri sɛ Nyankopɔn ne adasamma nim yei.

2 Ɛberɛ a ɛwɔ hɔ no, nnipa suasua yɛ ɛno bi,

na wɔfe no ɛberɛ a ɛnni hɔ;

ɛberɛ nyinaa ɔbɔ nsra sɛ wɔabɔ no nkonim abotire,

sɛ nkonimdifoɔ wɔ akansie wɔ nkonim boɔ a efi nni ho.

3 Mmom abusuyɛfoɔ mma bebrebe no ho remma mfasoɔ,

na wɔn mmaratoɔ mma no mu biara rennya nhini a atim

anaasɛ atintim fam pintinn.

4 Na sɛ wɔnya nnubaa berɛ kakra mpo a,

wɔnni nan papa gyina so, enti mframa bɛwoso no,

na mframa no ano den nti wɔbɛtutu agu fam.

5 Nnubaa no bɛbubu ansa na wɔaduru ne nyini so,

na wɔn aba bɛsɛe kwa,

wɔremmere yie na wɔadi, na ɛnyɛ ma hwee.

6 Ɛfiri sɛ mma a wɔwo wɔn wɔ adwamammɔ mu no

yɛ bɔne ho adanseɛ a ɛtia wɔn awofoɔ wɔ berɛ a Onyankopɔn bɛhwehwɛ wɔn mu.

7 Na mmom ɔteneneeni deɛ, sɛ mpo ɔwu ntɛm a, ɔbɛnya ahotɔ.

8 Ɛfiri sɛ nyinkyerɛ mu anidie mfiri sɛ wɔadi mmerɛ tentene nti,

anaa wɔsusu no wɔ mfeɛ dodoɔ ho;

9 nanso nteaseɛ yɛ ɛdwono ma obiara,

na tenenee abrabɔ yɛ nyinkyerɛ pa.

10 Nnipa bi wɔ hɔ a wɔsɔɔ Onyankopɔn ani, na Onyankopɔn dɔɔ wɔn,

na ɛberɛ a wɔne abɔnefoɔ teɛ no, wɔfaa wɔn kɔɔ soro.

11 Wɔfaa no kɔɔ soro sɛdeɛ ɛbɛyɛ a bɔne nsesa wɔn nteaseɛ

anaa nkontompo annaadaa wɔn kra.

12 Ɛfiri sɛ amumuyɛ ho akɔnnɔ kata adeɛ a ɛyɛ nyinaa so,

na ɔpɛ a ɛnenam no sɛe adwene a bɔne nni mu no.

13 Wɔyɛɛ pɛ wɔ berɛ tiawa bi mu no, wɔnyaa nkwa tentene;

14 ɛfiri sɛ wɔn kra sɔɔ Awurade ani,

ɛno nti ɔyii wɔn ntɛmntɛm firii amumuyɛfoɔ mu.

15 Nnipa hunui deɛ nanso wɔante aseɛ,

anaa wɔamfa no asɛm titire bi,

na Onyankopɔn adom ne ne mmɔborɔhunu ka wɔn a wayi wɔn no ho,

na ɔhwɛ wɔn a wɔyɛ n’akronkronfoɔ no so.

Ɔteneneeni nkonimdie

16 Ɔteneneeni a wawuo no bɛbu ɔbɔnefoɔ a ɔte aseɛ no fɔ,

na ɔbabunu a wayɛ pɛ ntɛm soɔ no bɛbu obusuyɛfoɔ mfeɛ tentene a wadie no ho fɔ.

17 Ɛfiri sɛ wɔbɛhunu onyansani awieeɛ,

na wɔrente botaeɛ a Awurade wɔ ma wɔn no ase,

ne deɛ nti a ɔkoraa wɔn so yie no.

18 Abusuyɛfoɔ bɛhunu, na wɔabu wɔn animtia,

nanso Awurade bɛsere wɔn wɔ atweetweesie mu.

Yei akyi no, wɔbɛyɛ animguaseɛ afunu,

na wɔbɛdwoodwoo wɔn wɔ awufoɔ mu afebɔɔ;

19 ɛfiri sɛ ɔde wɔn bɛhwehwe fam a wɔntumi nkasa,

na wawoso wɔn afiri wɔn mfitiaseɛ nohoa;

na wɔbɛgya wɔn akwaweɛ ne pradada so,

na wɔn ho bɛdwane wɔn,

na wɔn nkaeɛ bɛyera.

20 Wɔn akoma bɛtu berɛ a wɔrebu wɔn bɔne ho nkonta no,

na wɔn mmaratoɔ nnwuma bɛbu wɔn fɔ agu wɔn anim.

1 Na ɔteneneeni de nnamyɛ kɛseɛ bɛgyina hɔ

wɔ wɔn a wɔahiahia no no

ne wɔn a wɔbuu wɔn nnwuma ade ketewa bi no anim.

2 Ɛberɛ a obusuyɛni bɛhu wɔn no, suro pii nti wɔn ho bɛpopo,

na wɔn ho bɛdwiri wɔn ɛsiane ɔteneneeni nkwagyeɛ a ɛbɛba mpofirim no nti.

3 Wɔbɛkasa akyerɛ wɔn ho wɔn ho wɔ adwensakyera mu,

na wɔde honhom mu ahodwan bɛsi apini, na wɔaka sɛ:

4 Yeinom ne nnipa a ɛberɛ bi yɛdii wɔn ho fɛw

na yɛde ɛfene bɔɔ wɔn ahohora — nkwasea a yɛyɛeɛ!

Yɛdwenee sɛ wɔn abrabɔ yɛ adammɔ

na wɔn awieeɛ nni animuonyam biara.

5 Adɛn nti na wɔakan wɔn aka Onyankopɔn mma ho?

Na ɛdeɛn nti na wɔn kyɛfa wɔ ahotefoɔ mu yi?

6 Saa nti ɛyɛ yɛn na yɛamane afiri nokorɛ kwan no ho,

na tenenee hann no anhyerɛn wɔ yɛn so,

na owia ammpue wɔ yɛn so.

7 Yɛnyaa yɛn mayɛ wɔ mmarato ne ɔsɛeɛ kwan so,

na yɛtuu kwan faa anwea pradada so,

nanso Awurade kwan deɛ yɛnhunui.

8 Ɛdeɛn mfasoɔ na yɛn ahantan de abrɛ yɛn?

Na ade papa bɛn na yɛn ahonya mu ahohoahoa de abrɛ yɛn?

9 Saa nnoɔma no nyinaa ayera sɛ sunsum,

ɛte sɛ atesɛm a ɛtwa mu sene kɔ;

10 sɛ suhyɛn a ɛsene fa asorɔkye mu,

na ɛberɛ a atwa mu kɔ no, wɔnhu n’akyi kwan,

wɔnhu n’ananmu wɔ asorɔkye mu;

11 anaasɛ, te sɛ ɛberɛ a anomaa tu fa ewiem,

na wɔnhu ɔkwan a ɔfaa so kɔeɛ;

ɔbɔ ne ntaban mu pia mframa a emu yɛ hare no gu nkyɛn,

ɔde ne ntaban a ɔbɔ mu no fa mu kɔ,

na yei akyi no, wɔnhu ne ba ho nsɛnkyerɛnneɛ biara wɔ hɔ;

12 anaasɛ, ɛberɛ a wɔato agyan sɛ wɔde rewɔ biribi mu,

mframa a emu kyɛeɛ no san ka tua ntɛm ara,

sɛdeɛ obiara nhunu ne kwan.

13 Saa ara na yɛn nso yɛteɛ, sɛ wɔwo yɛn pɛ a, na yɛayera,

na yɛannya abrabɔ pa ho nsɛnkyerɛnneɛ biara nkyerɛ,

na mmom yɛn amumuyɛ mu na yɛyeraeɛ.

14 Ɛfiri sɛ, onipa bɔne anidasoɔ te sɛ ntɛtɛ a mframa de no rekorɔ,

ɛte sɛ bosuo a ahum de no rekorɔ;

wɔhwete no te sɛ wisie wɔ mframa anim,

na ɛtwam te sɛ ɔhɔhoɔ a ɔdi da koro pɛ nkaeɛ.

15 Nanso ateneneefoɔ tena ase afebɔɔ,

na wɔn akatua wɔ Awurade hɔ;

Ɔsorosoroni no hwɛ wɔn so.

16 Saa nti wɔbɛnya animuonyam abotire

ne atadeɛ fɛfɛ afiri Awurade nsa mu,

ɛfiri sɛ ɔde ne nsa nifa bɛbɔ wɔn ho ban,

na ɔde ne basa akata wɔn so.

17 Awurade bɛfa ne nsiyɛ de ayɛ n’akodeɛ nyinaa,

na wamma abɔdeɛ nyinaa amia ako atia n’atamfoɔ;

18 ɔde tenenee bɛhyɛ sɛ nkataboɔ,

na wahyɛ atɛntenenee sɛ dadeɛ kyɛ;

19 na wakura kronkronyɛ sɛ ɛkyɛm a aniwa nhunu,

20 na ɔbɛse abufuo ano hwetahweta te sɛ nkrantɛ,

na abɔdeɛ bɛka ne ho ne no ako atia n’atamfoɔ abɔdamfoɔ no.

21 Nnadeɛ anyinam bɛtutu akɔ wɔn botaeɛ ho tee,

na ɛbɛhuri afiri mununkum no mu akɔ ne botaeɛ ho, sɛdeɛ wɔato afiri tadua a wɔayɛ no yie mu,

22 na wɔbɛtoto ɔsoro aboɔ a ano yɛ den afiri taya mu;

na ɛpo bɛyiri abu afa wɔn so,

na nsubɔntene bɛkata wɔn so a ɛnnyaeɛ;

23 na mframa denden bɛbɔ atia wɔn,

na ɛte sɛ ahum a ɛbɛhu wɔn akɔ.

Na mmaratoɔ bɛsɛe wiase nyinaa,

na bɔneyɛ bɛbutubutu atumfoɔ ahennwa.

Ahemfo asodie

1 O ahemfo, afei montie na monte aseɛ;

O atemmufoɔ a mowɔ asase ano, monsua.

2 Monyɛ aso, mo a modi ɛdɔm so tumi,

na mohoahoa mo ho sɛ aman pii hyɛ mo aseɛ.

3 Ɛfiri sɛ mo tumi no firi Awurade hɔ,

na mo ahennie no firi Ɔsorosoroni no hɔ;

ɔbɛhwehwɛ mo nnwuma mu na wabisabisa mo nhyehyɛɛ mu.

4 Ɛfiri sɛ, moyɛ n’asomfoɔ yi, moanni tumi wɔ kwan papa so,

anaasɛ, moanni mmara no so,

ɛnna moannante wɔ Onyankopɔn botaeɛ no mu,

5 ɔbɛba mo so huuhuu ne ntɛm so,

ɛfiri sɛ atemmuo a emu yɛ den ba wɔn a wɔn dibea korɔn no so.

6 Ɛfiri sɛ wɔnam mmɔborɔhunu so de mmɔborɔfoɔ ho bɛkyɛ wɔn,

nanso atumfoɔ deɛ wɔbɛsɔ wɔn ahwɛ dendeenden.

7 Ɛsiane sɛ adeɛ nyinaa so Wura no remmfɛre onipa biara,

anaasɛ ɔnnhwɛ nnipa anim sɛ ɔyɛ ɔkɛseɛ ho;

ɛfiri sɛ ɔno ara na ɔbɔɔ okumaa ne ɔkɛseɛ,

na ɔdwene wɔn nyinaa ho pɛ.

8 Nanso nhwehwɛmu a emu yɛ den wɔ hɔ retwɛn otumfoɔ no.

9 Na afei mo, O ahemfo, me nsɛm ba mo nkyɛn,

sɛdeɛ ɛbɛyɛ na mobɛsua nyansa na moamfom.

10 Ɛfiri sɛ wɔbɛyɛ wɔn kronkron, wɔn a wɔyɛ nnoɔma kronkron wɔ kronkron mu no,

na wɔn a wɔde akyerɛkyerɛ wɔn no, wɔbɛnya banbɔ.

11 Saa nti, fa wo pɛ si me nsɛm so;

mompere nhwehwɛ wɔn na wɔbɛkyerɛkyerɛ mo.

12 Nyansa hyerɛn na ɛmmpa,

na wɔn a wɔdɔ nono, wɔmmmrɛ na wɔahu no,

na wɔn a wɔhwehwɛ no no hu no.

13 Ɔyɛ ntɛm da ne ho adi ma wɔn a wɔpɛ no no hu no.

14 Deɛ ɔsɔre ntɛm hwehwɛ no no remmrɛ ho koraa,

na wɔbɛhu no sɛ ɔte ɛponono anim hɔ.

15 Ɛyɛ nteaseɛ a ɛdi mu yie sɛ obi de n’adwene bɛsi ne soɔ,

na deɛ ɔmmia n’ani siri pɛ hwehwɛ no no, ɛrenkyɛ na ɔhaw afiri ne so,

16 ɛfiri sɛ ɔkyinkyin hwehwɛ wɔn a wɔfata no akyiri kwan,

na ɔnam adom so yi ne ho adi kyerɛ wɔn,

na ɔhyia wɔn wɔ adwene nyinaa mu.

17 Nyansa mfitiaseɛ pa ara ne nya a wobɛnya ɔpɛ ama nkyerɛkyerɛ,

ne nkyerɛkyerɛ ho ahiasɛm dɔ a wɔde dɔ no,

18 na ɔdɔ a wɔde dɔ no ne sɛ wɔredi ne mmara so,

na sɛ wɔredi ne mmara soɔ no yɛ daa nkwa ahotosoɔ,

19 na daa nkwa twe onipa bɛn Onyankopɔn;

20 ɛno nti nyansa ho akɔnnɔ no de kɔ ahennie mu.

21 Saa nti, O ahemfo a modi dɔm soɔ, sɛ mo ani gye ahennwa ne ahempoma ho deɛ a,

monni nyansa nni, sɛdeɛ ɛbɛyɛ na moadi adeɛ afebɔɔ.

22 Mɛka ade korɔ a nyansa yɛ ne sɛdeɛ ɛyɛeɛ a ɛbaeɛ,

na memmfa ahuntasɛm biara nkame mo,

mmom mɛhwehwɛ ne kwan a ɔnam so ɛfiri adebɔ ahyɛaseɛ,

na mamma ne ho nimdeɛ ada adi pefee,

na merentwa nokorɛ no ho da;

23 ɛnna meremfa me ho mmɔ anibereɛ tantane ne no ntu kwan,

ɛsiane sɛ anibereɛ mfa ne ho mmɔ nyansa.

24 Anyansafoɔ asafo mu na wiase nkwagyeɛ wɔ,

na ɔhene nyansafoɔ yɛ nnipa biara ahotɔ.

25 Saa nti momma me nsɛm nkyerɛkyerɛ mo, na ɛbɛyɛ mo mfasoɔ.

Ɔhene te sɛ onipa dasani biara

1 Me nso meyɛ onipa, te sɛ obiara,

meyɛ onipa a wɔdii kan bɔɔ no asase so no aseni;

wɔnwonoo me wɔ ɔbaa yafunu mu maa meyɛɛ honam,

2 abosome du mu na wɔde mogya nwonoo me,

firi ɔbarima aba ne anigyeɛ a ɛwɔ awadeɛ mu.

3 Na ɛberɛ a wɔwoo me no, mefirii aseɛ homee mframa a obiara home bie no,

na mebɛkaa asase so abusua ho;

me dede a ɛdi kan ne esu, te sɛ deɛ onipa biara yɛ no.

4 Wɔde ntoma kyekyeree me ho na wɔhwɛɛ me yie.

5 Ɛfiri sɛ ɔhene biara nni hɔ a ne nkwa nna ahyɛaseɛ yɛ sononko;

6 na ɔkwan koro na ɛwɔ hɔ ma wɔde ba nkwa mu, na ɔkwan koro na wɔde firi mu.

Anidie a Salomo wɔ ma Nyansa

7 Enti mebɔɔ mpaeɛ, na wɔmaa me nteaseɛ;

mefrɛɛ Onyankopɔn na nyansa honhom baa me so.

8 Mepɛɛ ɔno sene ahempoma ne ahennwa,

na sɛ mede ahonya toto no ho a, mebuu no sɛ adehunu.

9 Na mamfa no antoto aboɔden boɔ ho,

ɛfiri sɛ sika nyinaa te sɛ anwea ketewa bi wɔ n’ani so,

na wɔbɛbu dwetɛ sɛ dɔteɛ wɔ n’anim.

10 Medɔ no sene apɔmuden ne ahoɔfɛ,

na mepɛɛ sɛ mɛnya no sene sɛ mɛnya hann,

ɛfiri sɛ ne hyerɛn to ntwa da.

11 Nnoɔma papa nyinaa ka ne ho ba me nkyɛn,

na ne nsa mu ahonya wɔntumi mmu ano.

12 Megyee m’ani wɔ ne nyinaa mu, ɛfiri sɛ nyansa na ɛdii wɔn kan;

nanso na mennim sɛ ɔno ne wɔn na.

13 Mesuae a nnaadaa adwene biara nni akyire;

sɛ meremfa n’ahodeɛ no nsuma,

14 ɛfiri sɛ ɛyɛ agyapadeɛ a ɛntwa mu da de ma nnipa;

wɔn a wɔnya bi no ne Onyankopɔn nya ayɔnkofa,

wɔnam nkyerɛkyerɛ no mu akyɛdeɛ so kamfo wɔn ma no.

15 Onyankopɔn mma me nnwene asɛm ho yie ansa na maka,

na mennya nsusuiɛ a ɛfata deɛ manya no;

ɛfiri sɛ ɔno ne nyansa ho kwankyerɛfoɔ

na ɔtenetene onyansafoɔ.

16 Ɛfiri sɛ yɛn ne yɛn nsɛm nyinaa wɔ ne nsam,

yɛn nteaseɛ ne yɛn nimdeɛ sononko biara a yɛwɔ no.

17 Na ɔno ne deɛ adeɛ biara a ɛwɔ hɔ no wamma me ho nimdeɛ a mfomsoɔ nni ho,

sɛ menhunu sɛdeɛ wɔahyehyɛ wiase ne dwumadie a emu nnoɔma die;

18 mmerɛ mfitiaseɛ, n’awieeɛ ne ne mfimfini,

sɛdeɛ awia si sakyera, ne sɛdeɛ mmerɛ si di adaneadane,

19 sɛdeɛ afe no kɔ san bɛsi n’ananmu, ne sɛdeɛ wɔahyehyɛ nsoromma wɔ wɔn sibea,

20 mmoadoma su ahodoɔ ne deɛ ɛma wiram mmoa yɛ deɛ wɔnyɛ,

tumi a ahonhom wɔ ne nnipa adwentoatoa,

nnua ahodoɔ ne nnepa a ɛwɔ nhini mu;

21 Mesua hunuu deɛ ɛyɛ ahuntasɛm ne deɛ ɛwɔ petee mu,

22 ɛyɛ nyansa a ɔhyehyɛ nnoɔma nyinaa no na ɔkyerɛɛ me.

Honhom bi wɔ ne mu a ɛyɛ nyansa, kronkron,

sononko, ɛdɔɔso, ɛyɛ den sɛ wɔkyerɛ mu,

ɛnnyina faako, emu da hɔ fann, ɛnni nkekaeɛ,

emu da hɔ fann, ɛnyɛ mmerɛ, ɔdɔ adeɛ a ɛyɛ, ɛyɛ nam,

wɔntumi nsi no kwan,

23 ne yam yɛ, ɛyɛ timmɔborɔ,

ɛnhinhim, ɔsi pi, ɔnni ɔhaw biara,

ɔyɛ otumfoɔ, ɔhu biribiara,

ɛwurawura honhom biara a ɛyɛ

nyansafoɔ, ne ho teɛ, na ɛyɛ den sɛ wɔkyerɛ mu.

24 Ɛfiri sɛ nyansa yɛ kɔ ntɛm bra ntɛm kyɛn adeɛ biara a ɛkeka ne ho;

na ɛsiane sɛ ne ho teɛ nti, ɔwurawura kɔ nnoɔma nyinaa mu.

25 Na ɔno ne ahome wɔ Onyankopɔn tumi no mu,

ne adeɛ a ɛho teɛ a ɛfiri Otumfoɔ no animuonyam no mu;

saa nti biribiara a ɛho agu fi ntumi nkɔ ne mu.

26 Na ɔno ne mmerɛ santen hann nsɛso,

Onyankopɔn dwumadie ahwehwɛ a nkekaeɛ nni mu,

ne ne papayɛ no suban so.

27 Mpo sɛ ɔyɛ ɔbaakofoɔ a, ɔtumi yɛ adeɛ nyinaa,

na ɛberɛ a ɔnsesa no, ɔyɛ nnoɔma nyinaa foforɔ;

awoɔ ntoatoasoɔ biara mu ɔhyɛne akra a wɔyɛ kronkron mu

na wayɛ wɔn Onyankopɔn nnamfo, ne adiyifoɔ;

28 ɛfiri sɛ Onyankopɔn nnɔ biribiara nkyɛn onipa a ɔde nyansa tena ase no.

29 Ɛfiri sɛ ne ho yɛ fɛ sene owia,

na ɔhyerɛn sene nsorommakuo biara.

Wɔde no toto hann no ho a, ɔyɛ kɛseɛ,

30 ɛsiane sɛ anadwo ka no hyɛ,

nanso nyansa deɛ, bɔne ntumi nka no nhyɛ.

1 Ɔtrɛtrɛ firi asase ano baabi kɔsi asase ano baabi wɔ tumi so,

na ɔtoto nnoɔma nyinaa yie.

Salomo Dɔ a ɔwɔ ma Nyansa

2 Me Salomo, medɔɔ no na mehwehwɛɛ no firii me mmeranteɛ berɛ mu,

na mepɛɛ sɛ mɛfa no ayɛ m’ayeforɔ,

na n’ahoɔfɛ maa me dɔɔ no.

3 Ɔhyɛ n’adehyeyɛ awoɔ no animuonyam sɛ ɔno ne Onyankopɔn na ɛteɛ,

na adeɛ nyinaa Nyankopɔn no dɔ no.

4 Ɛfiri sɛ ɔno ne deɛ ɔde obi hyɛne Onyankopɔn nimdeɛ mu,

ne ɔboafoɔ wɔ ne nnwuma mu.

5 Sɛ ahonya yɛ agyapadeɛ a wɔpɛ wɔ abrabɔ mu a,

ɛnneɛ ɛdeɛn na ɛyɛ ahonya kɛseɛ sene nyansa a ɔyɛ ade nyinaa no?

6 Na sɛ nteaseɛ tumi yɛ adwuma a,

ɛnneɛ hwan na ɔso sene deɛ ɔhyehyɛ nnoɔma a ɛwɔ hɔ no?

7 Na sɛ obi dɔ tenenee a, ne nnwuma yɛ deɛ ɛtene;

na ɔkyerɛkyerɛ ahohyɛsoɔ ne nyansa aniteɛ,

atɛntenenee ne akokoɔduro;

biribiara nni abrabɔ mu a mfasoɔ wɔ mu ma nnipa sene yeinom.

8 Na sɛ obi repɛ suahunu a emu dɔ a,

ɔnim nnoɔma a atwa mu, na ɔde susu nnoɔma a ɛbɛba no;

ɔte kasabebuo ase ne aborɔme anoyie;

ɔwɔ nsɛnkyerɛnneɛ ne anwanwadeɛ a ɛrebɛsie no ho nimdeɛ dada,

ne ɛberɛ nkyekyɛmu ne ɛberɛ mu.

Nyansa ho hia ma nnipa sodifoɔ

9 Saa nti mebɔɔ me tiri mu sɛ mɛfa no ne no atena,

na menim sɛ ɔbɛma me afotuo pa

ne nkuranhyɛ wɔ adwene mu haw ne awerɛhoɔ mu.

10 Ɛsiane ne nti, sɛ mesua mpo a, mɛnya animuonyam wɔ nnipa dɔm mu

ne anidie wɔ mpanimfoɔ anim.

11 Wɔbɛhu me sɛ meyɛ nam wɔ atemmuo mu,

na wɔabu me wɔ nnipa sodifoɔ anim.

12 Sɛ meyɛ komm a, wɔbɛtwɛn me,

na berɛ a mekasa no wɔbɛtie;

sɛ mekasa kɔ akyiri a,

wɔde wɔn nsa bɛtuatua wɔn ano.

13 Ɛnam ne nti, mɛtena ase afebɔɔ,

na magya daa nkaeɛ a wɔn a wɔbɛba m’akyi no bɛhunu.

14 Mɛdi nkurɔfoɔ so,

na aman bɛhyɛ me tumi ase;

15 ahemfo a wɔn ho yɛ hu te me nka a, wɔbɛsuro me;

nnipa mu na mɛda me ho adi sɛ metumi yɛ na mewɔ akokoɔduro wɔ ɔko mu.

16 Sɛ mehyɛne me fie a, mene no bɛnya ahomegyeɛ,

ɛfiri sɛ nwononwono biara nni n’ayɔnkofa mu,

wo ne no bɔ bra a, yea biara nni mu, na mmom anigyeɛ ne ahotɔ.

17 Berɛ a mesusu yeinom ho wɔ me mu,

na medwene ho wɔ me tirim

sɛ wone nyansa bɔ abusua a, wotena ase afebɔɔ,

18 na n’ayɔnkofa mu wɔ anigyeɛ mapa,

na ne nsa ano nnwuma mu, ahonya mpa hɔ,

na deɛ wonya wɔ n’ayɔnkofa mu ne nteaseɛ,

ne otitire a woyɛ wɔ ne nsɛm ho,

mekyini hwehwɛɛ sɛdeɛ mɛnya no ama me ho.

19 Na meyɛ abɔfra a mewɔ akyɛdeɛ kɛseɛ,

na ɔkra pa yɛɛ me kyɛfa;

20 anaasɛ meyɛ nti, mehyɛnee nipadua a efi nni ho mu.

21 Nanso mehunuu sɛ merennya nyansa gye sɛ Onyankopɔn de no ama me

na ɛyɛ adenim ho agyiraeɛ sɛ wɔbɛhu deɛ ɛyɛ n’akyɛdeɛ

ɛno nti mefiri m’akoma nyinaa mu

srɛɛ Awurade bɔɔ no mpaeɛ sɛ: